Nüburtemi BJP agi laktetogo: Sharad Yadav

Mumbai, Aami/June 02 (Agencies): Tang tasen tentetba Loktantrik Janata Dal (LJD) nungi Sharad Yadav-i, tawa bye election osang ajanga linük nüburtemi temelenshi aginüba sayur, ta ashi.
Aami (June) 25, 2018 nü Mumbai Teachers and Mumbai Graduates legislative council constituencies election atema Sharad Yadav Mumbai yimtii oa lir; iba election nung LJD-ia tokteptsü.
Tanü osangbener den jembidang Yadav-i, “Tawa bye election osang ajanga BJP atema tarutsü tia sayur. Linük koda masüba tensa ka nung lir aser nüburtemi temelenshi yongyar, Nüburtemi BJP-i aniba sorkar agi lakatetogo,” ta ashi.
“Opposition party temi BJP anema sabang ka bushia longjemtsü atema inyaker. Opposition telongjemi merangba nungji takok angutsü ta ni amanger,” ta pai ashi.
Nikongdang pai Rashtriya Janata Dal (RJD) tongti, Lalu Prasad Yadav, Asian Heart Institute, Bandra-Kurla Complex (BKC), Mumbai nung ajurua liasü.
Taoba küm Yadav ya Janata Dal (United) nungi anentsüba sülen Rajya Sabha nungia anenja liasü. JDU Tir aser Bihar chief minister, Nitish Kumar-i Bihar nung Congress, JD(U) aser RJD teloktep toktsür Bharatiya Janata Party den loktepa sorkar akumba sülen Yadav-i ibaji anema jembi, aser iba nungji ajemdaker pa party nungi agiena liasü.