Nüburtemi Himachal nungi Congress agientsüla: PM Modi

New Delhi, November 04 (Agencies): Honibarnü Ato kilonser, Narendra Modi-i Himachal Pradesh nung Congress sorkar aija, ‘Congress Party ya shibu ama lir, aser November 9 nü assembly election nung BJP nem vote agütsüba ajanga state nungi Congress party agientsüla’ ta ashi.
Rait nung election nüboyim sentong ka nung jembidang Ato kilonser, Modi-i, “Tang Himachal Pradesh shirangdaktsüba tashidaktem ya Congress party shibu tera nungi agien nung ang taneptsü angutsü,” ta ashi.
Ato kilonseri ashiba agi, taruba election nung Congress-i tamakok angutsü ta parnoki metetogo, iba yongji parnoki chief minister Virbhadra Singh sendokogo.
“Nübo yimtsütsü atema Congress lenir tain kata yangi marur. Parnoki iba tiaji odang yutsüogo,” ta paisa ashi.
Ochimashi onük nung Congress aija Modi-i, Himachal nüburtem melungjang nung tejashi lir, aser election agiba anogo nung Congress-i parnok temenen atema süngjang arühtsü, ta ashi.
“Nenok dang BJP nem takok ngudakjang ta mepishitsü atema ni yagi aru masü. Party nem majority ngudakjang ta asüngdangtsü aser state nung aliba constituency ajak nungi Congress agienang ta mepishitsü atema ni yagi aru,” ta pai state nüburtem dang mepishi.
Demonetization küm ka ajungba anogo nung Congress-i black day amongtsü atema lemtetba anema Modi-i, ochimashi ajanga sen rizüngertem, shirnok auyatsü yimya süba-a lir, parnoki pa anisüngzüka meyutsür, ta aitsü.
“November 8 nü parnoki (Congress) black day amongtsü aser kü noksa rongdoktsü. Modi ya Sardar Patel’er nütsüng ta parnoki (Congress) memetet, aser ni tasümeiti malitsü, ni ochimashi anema maneni raratsü,” ta paisa ashi.
Taruba election nung BJP yaritsü mepishia Modi-i, Prem Kumar Dhumal chief minister inyakba mapang nung ang state nung terenlok kanga liasü, aser Atal Bihari Vajpayee Ato kilonser inyakdang pai state nung sen lemzüktsübaji Himachal Pradesh terenlok atema Dhumal-i kanga junga amshi, ta ashi.
Modi-isa, BJP chief minister candidate, Dhumal tenati state nung terenlok mapa inyaktsütsü aser infrastructure den tourism sectors jenjang tajungba kümdaktsütsü, ta nangzük.