Nüburtemi nashi shi achitsü akok: BJP lenir

Thiruvananthapuram (Kerala), October 19 (Agencies): UP nung nashi shi achi ta tai tonglokja Muslim nunger ka tepsetba sülen nungi linük nung nashi shi onük nung mangatettep ken o tulu adoka aliba mapang ka nung tanü Hombar nü Kerala nung BJP lenir V. Muraleedharan-ibo, nashi shi, jang shi mesüra ak shi-a süang, nüburtemi kechi chinüra sadema achitsü temeten lir, ta shiogo.
Kerala yimtiba, Thiruvananthapuram nung osangbenertem den jembidang Kerala Bharatiya Janata Party Tir, Muraleedharan-i, “Kechisa chinüdir ajak achitsü koka lir, nashi shi, jang shi mesüra ak shi asütsüa akok. Iba ya nija ka mulung,” ta ashi.
Linük nung BJP lenir aikati nashi tepsetba nokdangtsüla ta takhangba agütsüba mapang ka nung Kerala nung BJP tongti Muraleedharan-i, BJP-i nüburtemi kechisa achitsüla mesüra maschitsüla’ar ibaji kodanga metuyutsüla, ta ashi.
Kerala nung Congress-i aniba UDF aser CPI(M)-i aniba LDF na senteper local body election nung BJP tamakok ngudaktsütsü atema miim sentong ka bangjemtepogo, ta paisa aitsüogo.