Nüburtemi NPF Party dak temelung doka lir: S. Chuba Lkr

Mokokchung, Aenjeti (January), 25 (TYO) : Nagaland nung sorkar yimsüsübaji kodang asadangdir Regional Party temi küm 10 dak tema yimsüsüa mebendang, saka Naga People’s Front (NPF) iba küm 10 dak tema yimsüsüa arudagi, anungji ibaji ajanga nüburtemi NPF party dak temelung lemteta aliba sayur, ta tanü Animal Husbandary & Veterinary Services Parliamentary Secretary, S.Chuba LKR-i ashi.
24th Angetyongpang Assembly Constituency nung Naga People’s Front (NPF) Party nungi AC lenirtem aser Constituency kübok aliba Units ajak adenshia tanü Constituency Kimen, Wb.Alem Kichu’er kidang Sungkomen Ward nung telongjem senden amendang S.Chuba LKR-isa, Nagaland nung Party tasen aika adokogo aser itemji tesülenbo junga aotsüa akok saka tang tangbo nüburtemi NPF party sentoka mali, ta shisem.
Parliamentary Secretary-isa, tang Naga nunger yimyimji “Solution before Election” ta sür külem tangatetba nung MLA 60 aser lokti tentet ajaki noktakdagi, anungji iba tangatetba nung Nagaland Chief Minister-i sorkar lenirtem dang election nüboyim mesenzüi atatsü ashiba metetdakja liasü.
S.Chuba LKR-isa par constituency nüburtem dang NPF party-ji nenok kibur kechiaser pabo independent nung adoker NPF nung atenba dang, anungji nüburtemi lenisüba aser tangatetba nung 24th Angetyongpang Assembly Constituency nung Naga People’s Front(NPF) Party-i takok ngutettsü asoshi telongjem nung inyakdita atenshia aliba NPF party lenitem aser phukumertem ayongzüka ashi.
Iba sentong Wb Sentimar Pongen, 24th Angetyongpang Assembly Constituency nung Naga People’s Front(NPF) Party President-i ketdangsüa ani aser Unit ajak nungi shilem agia shisalemtepa jembia liasü.
Kasa sentong nungsa aruya aliba General Assembly Election nung 24th Angetyongpang Assembly Constituency nungi Naga People’s Front(NPF) Party Candidate S.Chuba Lkr asütsü aser jokola pa dak alaka tangar asoshibo kuli masütsü ta telemtetba takang agia liasü aser NPF Party President nem AC lenirtem aser Unit lenir ajaki meyongnem agir tezüluba nung agutsütsü telemtetba takang agiogo.