Nüburtemi teraksa anemer, terenlok aser yimsüsüba tajung aginer:Modi

New Delhi, November 29 (Agencies) : Linük tesem balala nung election BJP-i takok anguba sülen Ato Kilonser Narendra Modi-i, voter temi BJP dak tamang kaa vote agütsüba atema pelar aser ibaji ajanga nüburtemi teraksa anemer aser temelenshi aginüba reprangteter, ta ashi.
“Taoba anogo ishika India tesem balala nung asenoki election osang angashia aruogo — parliamentary, assembly aser civic polls,” ta Modi-i tweet kar ajanga lemsatep.
“Northeast, West Bengal, Madhya Pradesh, Maharashtra aser Gujarat tesemtem nung
BJP-i kanga junga ngutetogo. Ni nüburtem tenüng asanger,” ta Modi-i ashi.
“Tan election osang ajanga asenoki nüburtem dak tangatetba tajung aliba jangja meteter. Linük Nüburtemi tapu ajak nung terenlok aginer aser teraksa o yimsü junga mesütetba sorkar maginer,” ta Modi-i ashi.
Modi-i item o ya Maharashtra aser Gujarat municipal council election tem nung Bharatiya Janata Party (BJP)-i takok timba anguba sülen ashiba lir.
Sorkari sen 500 aser 1000 senpaktem nokdangba sülen mezüngsüa agiba by-election tem nung Assam, Arunachal Pradesh aser Madhya Pradesh state tem nung BJP-i takok angu.
November 19, 2016 nü state pungu aser Union Territory ka — Puducherry — nung constituency 10 nung assembly aser 4 nung Lok Sabha election tem agia liasü.