Nüburtemi tetsübo kecha melii pei vote agütsütsüla: Suu Kyi

Myanmar opposition lenila, Aung San Suu Kyi-i Yangon yimti nungi anülulentip tsütsüleni kilometer 60 shi pilar, Kawhmu constituency kübok Wah Ba Lauk Tauk yimtsüng nung ayongba election nüboyimtsü sentong nung shilem agia o jembiba noksa nung angur. (Wah Ba Lauk Tauk, September 22)

Kawhmu, September 22 (Agencies): Myanmar linüki taküm November ita agitsü ayongba general election sentong nung nüburtemi tetsübo kecha melii pei vote agütsütsü tajungshiba olen ka Myanmar opposition lenila, Aung San Suu Kyi-i tanü Bodbar nü metetaktsüogo.
“Asenok ya 1990 mapang nung alir masü anungji nüburtemi kecha metsübotsüla. Aji oda, asen linüki nungdakba democracy yimsüsütsü den sentakba temelenshi tajung asangsang nung agitettsüsa nüburtemi tan ayongba election nung pei vote agüja tongti shilem agitsü ajungshir,” ta lai tanü ashi.
Suu Kyi-i lar Kawhmu constituency kübok Wah Ba Lauk Tauk yimtsüng nung ayongba election nüboyimtsü sentong nung o jembia shilem agidang tanü iba olenji sangoktsü.
Taoba küm 25 tejaklen nungi tenzüka raraba sülen tan mezüngsüa Myanmar linüki democracy yimsüsütsü yimya benshia taküm November ita 8 nü agitsü ayongba parliamentary election nung Suu Kyi-i aniba National League for Democracy (NLD) yimtenren teloki takok tulu angutsü ta nüburtemi teimla tulu yua lir.
Ajisüaka, election tembangba sülen tentetba parliament tasenba nung züngsemba yimsüsürtemi shimtsü aliba Myanmar Tir tasenba inyaktsütsü asoshi lai shiba sapur iba osangbo Suu Kyi-i tanü tashi lar nüburtem dang metetdakja mali.
Ano külen, lar linük temzüngi memelaba yong Suu Kyi-i Myanmar Tir menden abentsü temeten monguteti aliba osanga jangjaogo.
Bendanger den kibong akümer mesüra pei chirnurtemi bendang senso agia alir ka nem Myanmar Tir menden abentsü temeten magütsütsü asoshi lar linük temzüng nung lateta lir.
Aji oda, Suu Kyi-i bendanger ka, Britain nunger ka den kibong akümba den külemi, lar jabaso anapronglai Britain senso agia aliba yong lai lar linük indang Tir menden abentsü temeten mongutettsüsa tang jenjang ajurua lir.