NUCF & Town Councils, WSH nungeri Dimapur airport atema rongshir

Dimapur, January 16, 2026 (TYO): Assam Rifles Training Centre (ARTC) ajanga Airport Authority of India (AAI) ali atsünga agiba aitsür ta Nagaland Urban Council Federation (NUCF) den Town Councils 36 pronglai metetdaktsüogo.

Dimapur Airport ulushitsü atema ARTC tangsa belentsüla ta parnoki sangdong ka nung ashi.

Iba ali kibur ya AAI lir anungji ARTC ozüng alema ali atsünga agia lir. Iba atema shidi balala züluaka aser training centre belentsü mepishiaka hao ta mali yutsüba atema mepelar ta NUCF aser Town Council temi ashi.

“ARTC belena maoba ajanga Dimapur Airport ulushia tajungba küma yanglutsüba nung tetsükdaktsü ajurur. Nagaland nung civil airport ka dang alibaji Dimapur Airport lir saka renloka maoba ajanga air connectivity nung timtem ajurur, rongsenketzüng mainer, rongdak mapang mapa shitak meinyaktettsüsa tia ka nung aser Nagaland nung tourism & investment indang maongkatem magiteter” ta parnoki ashi.

Urban local bodies yagi nübortem aginüba ola adoker aser nisung ajaki public infrastructure atema lemzüktsüba ali ya timi amshitsüla ta temulungtetba lir. Anungji ARTC-i AAI ali toktsütsüla aser iba ya Ministry of Home Affairs aser Ministry of Civil Aviation ajanga mapang atakzüker inyakdaktsütsüla ta NUCF aser 36 Town Councils-isa metetdaktsüogo.

ARTC-i AAI ket nung ali meyipa magütsüra ibaji public taginüba aser terenlok anema ta züngshitsü aser onoki ozüngi melaba ama inyaka aotsü ta NUCF aser Town Council temisa ashi.

Külen, Western Sümi Hoho-ia tanga sangdong ka ajanga Dimapur Airport ali atsünga agiba magizükba metetdaktsüogo.

ARTC-i mapang talangka iba ali atsünga agiba ajanga Nagaland renloka aotsüba nung timtem tulu agütsür ta parnoki ashi.

Küm aika tejakdang Dimapur airfield ali ya civil aviation ketdangpur ket nung agütsü aser ibaji AAI ketdangsübaren kübok lir. Ajisüaka ARTC-i iba ali toktsür aotsü memulungi noktakba nung temeten kecha mali aser iba ya public taginüba anema lir ta WSH-isa metetdaktsüogo.

Dimapur Airport ya kanga dang tongtipang infrastructure ka aser Nagaland renloka aotsü atema tongti lir. Ajisüaka tuluba aser tajungba küma meyanglutetba ajanga air connectivity mesademer, tourism aser investment lenmangtem shibanger aser Nagaland nung alir nem modernization temeten magütsür, ta parnokisa ashi.

Iba ali melena ARTC nem tanga ali agütsüogo anungji Assam Rifles-i linük kümzüka ayur ka ama tenangzüktep agia alibatem akhümtsübutsüla aser AAI ket nung ali meyipa agütsütsüla ta Western Sümi Hoho-i shiogo.

Nagaland nung alirtemi mapang talangka ataogo aser joko atsülanga aotsü memulunger. Anungji bangdakpur ajaki mapa inyaka tekaratiba nung airport ali meyipa agütsütsü ayongzüker ta WSH-isa metetdaktsüogo.