Nüchi akümba yimya ka

Nisungtem libaliro nung nüchi akümba mesüra makümba jenjangji merükmeju asüba aser masüba agi bendangtettsü. Kodang nisung nüchi kümdir, idangji merükmeju tenzüktsü. Aji oda, küm noklangka shi jakdang asen tsüraburtem mapang parnok nüchi makümba agi merükmejutsü memeteti liasü. Iba jagi parnoki tzü chigua temang merüka alitsü memeteti liasü. Parnoki kilong aser kima merüka mayu. Aji oda, kilong nung ak an yipdaktsü aser kima yimdong ak aser nashi scü agi sünga liasü. Itemjibo yutsür, nisung tasümang dena kilong nung mi apudak azük nung sendaka yur külenang leperi bener ao aser leper nungjia tasümangji azük nung dang ayu, kechiyong asenok sobaliba nung tasümang ali telong nung aremba mali asü. Nisungbo nisung saka iba ama merükmejutsü memetetba tia ka nung asenok tsüraburtem liasü. Ajisüaka, lia lia kodang asenok dangi kaketshisatsü aru, asenoka tangar tashitemeteter libaliro angazüka nüchi akümtsü tenzük. Joko, idangjibo tzü chigur süoshi temerük asemtsü tenzük, kidang chipo anpo aser auso marok shidoker amshitsü tenzük, kilong aser kima jungjunga oker merüka ayutsü meteta aküm. Oda oda, tebu mozü amshia tebu dena meyutsü tenzük, ku nung totsü aloktsü meteta aküm aser tejak nung cream ateptsü tenzük. Aji oda, tetsüng tesa senzüa aliba to sandal aser tsüngsem asemtsü tenzük. Joko, nisungtem terabo nüji küma merükmejutsü meteta arudang, pei alidak ak shibanger metsütsü tenzük, metsümeshidak balaka yanglur amshi. Anungji, kilong kima dang masü saka yimdong ajak sangwa-sangwa merük-merüka aküm. Ajisüaka, meilongi meilongi asenok merükmejutsü meteta akümertem aika pei ajungtsü asoshi dang bilemer küma adok. Ibayongji, pei kilong aser kima merükba dak alaka pei dena senzütsüba yimkong meyong yimdongbo kecha hau ta mebilemi  jana endokdok kümdaktsüba asenoki angutsü. Atangji, akhidangbo kibong ka achiajemtsü awazüdang janaona aikabo mebenden, kechiyong dokan nungi alia bener aruba chiyongtsü aser tagitarutsü aikabo mali asü, anungji kilong aser kima janatsüsa kechisarina alepba kaket aser polythene bag mali asü. Ajisüaka tanü asenoki asenoksasa asenok libaliro reprangdangra, kechisarina ajak dokan nung alia aleper bener arur aser item taleptsütemji ki tongerbo jana akümer. Iba denji akhidang amato masü tanü asüng khen chiyongtsü awazüdang chiyongtsü tapu aika soruchioker, anungji chiyongkiyong temer tanüngbaji aika jana akümer. Tanü town nung balaka item janaonatem  mashi mashi endokba agi yimti topur ajung raksar aser tashidak tapu balala poktetdaktsür. Atangji, pei agitsü asoshibo asenok ajak nüchi jungjunga kümer asünungji, pei kidang janaba janaona ajak to polythene bag nung seper oagi tangar kima aser tangar atsü nung endoker. Senso kati pei alidak pei lima menentsüsa inyakba temenen tulutibaji aji asütsü. Idakji azümasen, ochimashi aser pei kija ajungtsü bilemba jakla tamajung aika dena lir. Tanü asüng ya Nagaland nung yimtsüng lenmangsa tajungba aser temerükba angur. Ibaji asenoki Amguri aser Mokokchung na tsüngda ajanga süidang yim aika kanga merüka ayuba angutsü. Ibaji  nüchi akümba temaitsü lir.  Ano külen Nagaland nung memerüktiba yimtiji Dimapur asütsü amai bilemer. Iba yimti nungbo janaona bendena bener orr endokba tesema dena junga yanglua mali. Anungji, tang tashibo shirurutem dang masü saka asenoka dena shirangtsü amai janaona agi asenok meketbanger alir. Iba amaji Dimapur Govt. college nung dena kima National Highway lenmang lendi nung nisungtemi janaona endokba tesem küma amshia lia, yakanü to tamalen aser tang tezüngdak kaketshirtemi yaritepa item janatemji endoktsüogo aser jana endokdak tesem agi kaketshirtem gari atadang mena kazüdak aser achiajemtsü angudak canteen ka yanglutsütsü kaketshir tejenpurtemi lemteta lir. Iba amaji asenoki tesem tesem nung jana endokba tesem agi topur tajung tesem küma yanglutsüla.  Atangji, asenoki asenoksasa asen kidang janaba janaonatem ongken tur yangji bendentsüa akok mesüra  rongdokra, ibajisa tajungba mesüra yimteni janaona endokdak kong yanglua lir, ibaji bushia oa endoktsüla. Tangari asen kilong kimabo mangutsü saka kima yimdongbo angutsü, anungji kilong kima ama kima yimdong merüka ayutsübaji senso shia aser kibong shia khuret asütsüla. Iba jagi dang asenok nüchi kümogo ta tangar ajanga süirtemia metettsü.