Nüchibosa Maküm

Nagaland nung vote agütsütsüpurtem mesüzüktsü atema sen agütsüba den lokti chiyungdakja  yi jemdaktsür, ta NDTV ama National news channel ka nung video prokshibaji asenok Naga nunger atema nümadangtsü kabo masü, saka tangar dang asenok ano nüchibosa maküm ta sayur. Joko Nagaland nung election aika agia arudang candidate temi sen alemba aser vote agütsütsüpurtemia sen akhangba ya inyakyim ka ama kümogo, saka National news channel ka nung Naga nunger voters ji yi aser chi aosu ka nem mesüzükdaktsür, ta NDTV reporter kati sangdonga lokti chiyungtepba video ji TV aser social media nung ayimsünga prokba jagi asen Naga nunger ajak maaksütsüogo. Tang asen lima nung NBCC-i anir Arogotemi, lokti tentettem aser Election Commission-ia nungita ‘Clean Election’ mapatong inyaka aruba ajanga NDTV osangbener jagibo asen lima election tensaji junger südi, ta imlaa aruba asütsüa akok, ajisüaka asenoki noksa tamajung ka dang sayur yokogo. NBCC General Secretary, Reverend Keyho-i, “Nüburtemi ibaji odiodia jembir. Tatishitsü agi- Vote ka atema candidate temi sen meyirjang 2-3 agütsür. Anungji ozüng kibong nung vote 4-5 lira item ajungaji meyokpter sen meshir. Ibaji nisungtemi odiodia dang jembir,” ta shiogo. Election nüboyimba mapang nung candidate kati sen lakh 20 dak tema meindoktsü Election Commission-ibo latetja lir, ajisüaka asen lima nung election mapang voter temi candidate ka indang sen crore sa crore chitsür, iba jagi parnok yimsüsüba menden nung amendang terenlok mapa meinyaker. Asenoki anüdoklen alirtem ama chiyunger, sobur, gari tajungtiba amshir aser jembishinur ajisüaka asen libaliro jagibo asenok ano nüchibosa maküm ta sayur. Onok nisung 20 telok ka kümogo, onok kibong 10 longjemogo, ozü yimteni na yaritsü lemtetogo, mesüra ozü club pur vote ajak agütsüdi onok nem sen lakh ka/ana agüjang, ta candidates dang sen meshir, ajioda agütsür. Anungji election ya yimten tashitait ka shimtsü aser nübur ajak lireptsüka alitsü atema pei tangatetba tajung nung senti vote ka agutsüba sabang ka masü saka candidates rongsen ajak chimatsüa chiyungtepba, yi jemtepba aser sen shibai timba meshizükteter ta sen saiba mapang ka dang mesüka kümdaktsüogo. Ibayongji EC-i sen lakh 20 dang latetja liaka election mapang nung candidate temi sen crore aika indoker aser takok ngura pai election mapang nung indokba sen tama bushitsü (recover) atema bilemer, iba denji külemi taruba election atema-a sen rizünga ayutsü bilema inyaka alitsü. Item kuliji ajanga asen lima mainer aser vote yoka achirtem aoksabajibo yutsür ochishia vote agutsürtema akoksar. Tanü candidates dang sen meyirjang ishika yong vote ayokertem kibong aser sen memeshirtem kibongji tetsüngdaji kecha balaka masütsü. Sen meshirtemi election temer sen jagi yi alia ajemtsüa akok, kidang tagitsü oset kar alitsüa akok mesüra tanur tatidang mapang nung amshitsüa akok, ajisüaka taruba küm pongu tashi sorkar mapatong balala nungi tajangzük balala junga magitettsü. Tan election nungbo asenoki pei shisatsü agi pei maitsütsüsa tetemsü candidate nem vote agutsüdi. Candidates dang sen aika meshizüktetaka iba jagi azükaru masütsü saka taliba tim-atemtsüsa tensa kadang ajurutsüa akok. Yimten yabo temeshi, anungji yimten shimba nung aibelenertembo Tsüngremi merenshilang lang.