Nüchiso anogo

Naga nungertemi India yimten temzüng kübok melinü saka India-i kechisüdirsüaka Naga lima ya India kübok yunüba agi Naga nunger lushia junga mangu aser memetet ser India telongjem küboki kangshia aitdaktsü. Ajisüaka, küm 70 jakdang Naga nunger dak tashitemetet tuluka meliaka, Naga nunger asoshi yimten jenjang tajung ka lateta yutsünübayong, Naga National Council (NNC)-i India dang tama 1947 küm August 14 anogo nung Nagaland yimten nüchiso nguogo ta sangdongba agi tanü tashi India nunger o Naga nunger na bendangteta lir. Atangji, iba yimten nüchiso sangdongba osang ya NNC lenirtemi British mesüra India yimten lenirtem den haihaura katepa tangatettep ken o ka yanglur sangdongba masü asünungji, tanü tashi Naga nunger tesadang ka Myanmar aser tesadangka India temzüng kübok lidagi. Aji oda, British aser India yimteni Naga nungertemi yimten nüchiso sangdongbaji magizük nungji, India yimten nüchiso anguba sülena 1947 küm NNC nung mezüng tir Wb.Aliba Imtii anir NNC lenirtem Delhi tashi oagi Mahatma Gandhi aser Jawaharlal Nehrun nungertem ajurua Naga nungertem India temzüng kübok kangshia mayutsüla, kechiyong parnokji India nunger masü ta kanga süoki ia jembia liasü . Idangji, Mahatma Gandhiibo parnok dang Naga nungertemi India kübok melinüra shibaibo kangshia lidaktsütsü, ta telangzüba tajungba ka agütsüba tanü tashi jembir. NNC lenirtemi Mahatma Gandhi ajuruba sülen pa kaseta südaktsüba ajanga Naga yimten nüchiso angutsüba teimla tuluka samaadok. Naga nunger yimten nüchiso asoshi jembi tenzükba anogoji 1929 küm Naga Club-i British yimli kübok India yimten jenjang asadangtsü asoshi shimtetba Simon Commission nem Naga nungerbo India kübok masü, parnok yimten yimli balaka nung toktsütsüla ta tezüluba nung agütsüba ken o aser anogoji liasü. Iba sülen NNC leniba kübok Naga yimten nüchiso asoshi maneni jembia aruaka, British nungertemi Naga nunger asoshi yimten jenjang balaka lateta meyutsüi India nem nüchiso agütsütsü renemba meteta Naga nungertemi India dang tama yimten nüchiso anguba osang sangoktsü. Iba anogo nung jagi tenzüka tanü tashi Naga nungertem talibo tangar yimten temzüng kübok alir saka 1947 küm 14 August anogo nung Naga nunger yimten nüchiso nguogo ta sangdongba anogo mamadoki amonger. Atangji, yimten nüchiso anogomong mongaka, shitakba nungbo Naga nungertem tanü tashi India aser Myanmar yimten kübok alena lir aser küm shia August 14 ajurudang Naga nunger yimten nüchiso angutsüba temeten aser teimla indang jembir. Temelenshi kaji, tanübo tetsübu melii Naga yimten nüchiso indang jembir aser Naga yimten nisan asonger. Iba jagi Naga yimten nüchiso asoshi raraba tongpang ano maneni lir ta sayur. Naga yimten nüchiso tongpang nung Naga nunger senti taküm aika laluogo. Talisa 1954 küm nungi Nagaland state anguba sülen 1964 küm India o Naga nunger na tsüngda Ceasefire tangatettep ken o meyanglu tashi küm ter Naga nungertem India sepaitem ket nung reshikangshiba otsüji tebang agi ashitsü makokba timtem tekangshi aser mezüngmeshiba otsü lir. Tanü taintemi item otsütemji lanurtem dang ashitsüla aser lanurtemi item otsü kakettemji bushia azüngtsüla. Item otsü metetba jagi mang ayangtsü ta masü saka pei tetsü taso lima tali meimtsü aser lenirtem shirnoki Naga lima asoshi taküm bendanga agüja raraogo, parnok taküm tenla mamatsü. Atangji, Naga yimten nüchiso bushiba otsüji India sepaitemi Naga nunger reshikangshiba otsü dang masü saka Naga nungertemi Naga nunger reshikangshiba aser azü tokshiba otsü lir. Itemji kodaser amadoktsü ! Ajisüaka, mangyangtepba agi Naga nunger nüchiso jenjang kodanga mangutsü ta angateta, asenokbo tanü ama Naga yimten nüchiso amongba anogo nung taidok agütsütepdi. Asenokbo nüchiso anguba anogo amongba ya taidok agütsütepba anogo südaktsüdi. Iba jagiang asenok nüchi akümtsü aser nüchiso anguba taküm amai alitsü.