Nüchiso atema rarartem pension itasen 20% tutsür

New Delhi, September 21 (Agencies): Tanü sorkari linük nüchiso atema rarartem pension itasen 5,000 shi tutsüogo, item rongnungi Andaman Islands nung aliba Cellular jail nung puokertem mesüra British India adener tangalen timtemertem densema lir.
Ato kilonser, Narendra Modi leniba nung Union Cabinet senden ka amendang nüchiso atema rarartem, parnok apuanitem aser senmangertem nem pension shilem 20 tutsütsü telemtetba agia liasü.
Tan tasen küma yanglushiba pension-ji basic pension ama züngoka, iba nungji ajemdaker nüchiso atema rarar pensioner tem atema Dearness Relief renemtsü, ta ketdangser sangdong ka ajanga metetdaktsü.
Industrial mapa inyakertem atema All India Consumer Price Index nung ajemdaker agütsüba Dearness Relief inyakyim, koba nüchiso atema rarar pensioner nema küm nung khen agüja liasü, iba ya joko anentsü aser Central sorkar mapa inyakertem nem küm nung anaben agütsüba ama Dearness Allowance inyakyim agi melentsü.
Pensioner tem atemabo iba dangji “Dearness Relief” ajatsü, ta sangdong nung shia lir.
Ano nüchiso atema Andaman nung yimtenren tsütsü tepuokertem aser parnok apuanitem indang pension itasen 24,775 aliba nungi 30,000 tutsür.
British India adener bendanglen nüchiso atema rarar pensioner tem itasen 23,085 aliba nungi 28,000 tutsür.
Iba den kasa Indian National Army (INA) züngsemtem densema tanga nüchiso rarartem pension itasen 21,395 aliba nungi 26,000 tutsür.
70buba Independence Day anogomung nung jembidang Ato kilonser, Narendra Modi-i nüchiso atema rarartem pension itasen shilem 20 tutsütsü, ta sangdonga liasü.
Central freedom fighter pensioners aser temsüa aliba kinungertemi ‘Swatantrata Sainik Samman Pension’ kübok August 15, 2016 nungi tenzüka pension tur angutsü.
Swatantrata Sainik Samman Pension Scheme, 1980 kübok tang tashi nung nüchiso atema rarar aser parnok kinungertem 1,71,605 tajangzük nguogo.
Tang iba scheme ajanga nüchiso atema rarar aser temsüa aliba kinunger 37,981 tajangzük ngudar. Parnok rongnung nisung 11,690 nüchiso atema rarartem, parnok apuanitem (amitsür/sangremer) 24,792 aser pensioner jalatem 1,490 lir.