Nuclear amshia amaktsü ojang amokmerenang: US

Seoul, October 27 (Agencies): United States-i North Korea den meraranür, ta United States Secretary of Defense, James Mattis-i North Korea nungi metre ishika orr demilitarized zone nung nokdaker Pyongyang-i nuclear noknü amshia samatsütsü amokmerenba anentsü indang jembidang shiesm.
South Korea nung democracy lir saka kindanger linük North Korea nung lenir Kim Jon-un-i nüburtem tim lenmang masüba nung anishir, ta South Korea Defence Minister Song Young-moo anasa nokdaker jembidang ashi.
“Onok nükjidong ya rara masü saka Korean Peninsula nung tejangja aser meyiba mamshitsüba denuclearisation aginür,” ta Panmunjom yimtsüng nungi jembidang Mattis-i ashi.
South Korea nung United States-i America nunger mitkar 30,000 shi yoka lir aser iba peninsula nung 1950-1953 tsüngta raraba official süa metembang saka armistice agreement nung dang sign sütepa lir.
“North Korea-i kodanga nuclear nok-nü mamshitsü aser parnoki amshira South Korea aser US na lungjemer sashia langzütsü,” ya Song-ia ashi.
Korea ana tsüngta yimjung ken o jembitsü asoshi North Korea arutsüla, ta Song-i shisem.