Nuclear mapatong ajema inyaktsü tebilemba mali: Lodhi

New York, September 21 (Agencies): Pakistan-i par tongpang nung amshitsü nuclear mapatong taoba mapang nungi tajemba inyaktsü tebilemba maliba olen ka par United Nations (UN) envoy, Maleeha Lodhi-i tanü Bodbar nü metetdaktsüogo.
Islamabad-i par tongpang nung amshitsü nuclear mapatong tajemba inyaktsü tajungshiba olen ka US-i yashi, Mongolbar nü metetdaktsü aser iba nem telangzüba agüja, Lodhi-i tanü iba olenji sangoktsür lir.
US Secretary of State, John Kerry-i Pakistan Ato Kilonser, Nawaz Sharif den yashi ajurutepdang par Pakistan-i nuclear mapatong tajemba inyaktsü ajungshia liasü.
“Pakistan-i tenzüka aliba nuclear mapatong ajema inyaktsü tebilemba mali. Ozü Pakistan-i nuclear mapatong ajema inyaktsü mapatong benokba jakdang kidangsüa aliba India linüki tamasa par nuclear mapatong tajemba inyaktsü nungdaker,” ta Lodhi-i metetdaktsü.
“India-i tenzüka aliba tongpang nung amshitsü nuclear osettsüset yanglua kasaji rizüngtsü mapatong azüokba sülen ang alimai ozü linüki tenzükba nuclear mapatong tajemba kümdaktsütsü ayongzüker,” ta lai shisem.
“Pakistan-i kiralongrar anema raratsüren nung bendanga agüja inyakba ama linük tangai inyaka maliba kuli alimai ngua lir,” ta lai lar Pakistan metentsüba olen ka lemsatepa liasü.