Nuclear tezüngzüktep agiba ajanga tesendaktep jungdaktsür: Rouhani

Tehran, August 24 (Agencies): Alima tashi abenba linük lenirtem den par Iran-i nuclear tezüngzüktep agiba ajanga par tesendaktepbarena taoba mapang nungi tang tajungba akümba olen ka Iran Tir, Hassan Rouhani-i tanü Hombar nü metetdaktsüogo.

Rouhani-i par linük semdangsang, Britain Foreign Secretary, Philip Hammond den ajurutepba sülen tanü iba olenji metetdaktsü.

Iran-i nuclear osettsüset yanglutsü tenzükba aser iba yongji West linüktemi par Iran anema tenokdangba sentong balala benoktsü tenzükba ajunga agientsü nükjidong tulu yur külen par telok ana tsüngda taoba July ita nuclear tezüngzüktep agi.

Yamaji inyakba sülen parnok rong nung tesendaktep tanaben junga akümba temaitsü sayua Iran aser Britain nati par embassyTehran aser London na nung yashi Deobar nütu tanaben tentetshiogo.

Iran-i tenzükba nuclear sentongtem anenba melena par linük anema benokba tenokdangba sentongtem agientsü asoshi agiba nuclear tezüngzüktepji taruba ita ishika tsüngda nungi tenzüka mapa küma inyaktsü renema lir.

“Ozü Iran den nuclear tezüngzüktep agiba ajanga tajangzük tulu angur ta ozü linük den nuclear tezüngzüktep agirtemi tarutsü mapang nung angatettsü,” ta Rouhani-i shisem.

Paisa ashiba agi, nuclear tezüngzüktep agiba ajanga regional aser international sabangtem nunga tesendaktep tajungba küma tensa tajungba akümtsü.

“Asenoki asemtsü merangba jakdang tamasa jajatsü merangdi,” ta shia, Iran anema tenokdangba sentong benokba atema jashia Iran’er lokti tulu kati taoba mapang, 2011 küm raksatsüba Britain embassy ki tanaben yanglushir külen kasaji tanaben tentetshitsüogo ta Hammond-ia yashi metetdaktsü.