Nuclear tezüngzüktep agiba sülen Iran-i tan mezüngsüa election agir

Tehran, February 26 (Agencies): Alima tashi abenba linük lenirtem den nuclear tongpang osettsüset meyanglutsü tezüngzüktep agiba sülen Iran-i tan mezüngsüa agiba parliamentary election sentong nung Iran nüburtemi pei vote agüja tanü, Hokolbar nü shilem agiogo.

Conservative yimtenren teloki amokbangba parliament menden 290 aser züngsem 88 tashi densemba Assembly of Experts mendentem asoshi tan agiba election sentong nung Iran nütsüng yongsük nisung million 55 shi pei vote agüja shilem agitsü renemba osang angazükogo.

Assembly of Experts-i bendang linüktem den sentakba telemtetba ajunga tatemküma Iran asoshi agisang, Supreme Leader Ayatollah Ali Khamenei-i agiba telemtetba ajunga mapa küma inyakba den külemi, par Supreme Leader-a iba telokisa shimer.

Tan agiba election nung temaba jenjang ngua Conservative telok den tashi tuluba angutsü asoshi Reformist yimtenren teloki alizüng ayuba osanga angazükogo.

Ano, tan election ya Reformist Tir, Hassan Rouhani atema tongtipang election ka lir kechiyong pai sangküm, 2017 küm Tir menden tanabenren abentsü asoshi Tir election nung toktepa shilem agitsü alizüng yua lir.

“Iran linük meimer nübur ajungai tan election nung pei vote agüja shilem agitsüla. Iran ya arrür jenti aliba linük ka lir aser parnoki Iran jenjang tamajungba kümdaktsütsü anogoshi meranger. Anungji, Iran nüburtemi pei tangatetba melenshia Iran temaba jenjang nung ajungkettsütsü merangtsüla,” ta Khamenei-ia pa vote agütsüba sülen ayongzüka liasü.

Polling station-tem nung nüburtem imlaba dang nungi timba sentepa yong parnok ajunga nem vote agütsüdaktsütsü nükjidong nung vote agütsütsü mapanga ghonda 2 agi atsünglangtsüba osang jangjaogo.

Tan agiba parliamentary election nung takok angur yimsüsürtemi küm 4 tashi MP akümtsü maongka angutsü aser nüburtemi shimba cleric 88-i Assembly of Experts züngsem küm 8 tashi abentsü.

Tan election nung shimba Assembly of Experts-temi arishi küm 76 tain Khamenei melenzükera shimtsü maongka angutsü akok.