Nuiland nung Aajeevika Evam Kaushal Vikas Diwas among

Dimapur, Monupii/May 05 (TYO): Tanü conference hall, ADC Niuland nung Aajeevika Evam Kaushal Vikas Diwas sentong agiogo, ta ketdangsertem osang ka ajanga metetdaktsü.
Iba sentong nung jembidang Under Secretary & Nodal officer, Government of India, A.K.Mishra-i, India sorkar indang scheme balala koma inyaker, itemji reprangdangtsü atema pa observer ka ama aru, ta metetdaktsü.
Pai ashiba agi, India sorkari benokba scheme balala koma inyakdar, aser item schemes ajanga nüburtem ajangzükdar asü majangzüker, ibaji metettsü atema Ato kilonser, Narendra Modi-i Gram Swaraj Abhiyaan ya tenzük.
Paisa Ato kilonseri achaayanga inyakba scheme tenet rasaa ashi aser yimdaklirtem dang item schemes indangji metet asü memetet, ta asüngdang.
Pai yimdaklir tetsürtem danga item schemes nungi tajangzük agitsü ajungshia, “Tetsürtem pei sasa litet nungang pei sasa sen aa tenzüktsü,” ta ashi.
Okila jembidang BDO cum BMM, Nuiland block, Akumenla Aier-i, iba sentong ayongzükba tongtibangtiba nükjidongji yimdaklirtem aser Self Help Groups (SHGs) ajungshitsü aser parnok angutsü aliba tajangzüktem metetdaktsütsü atema lir, ta metetdaktsü.
Laisa Kaushal Panjee indang metetdakja, iba ya arishi küm 18-35 tsüngdapur mapa mengui alir lanurtem ajungkettsütsü atema lir, ta metetdaktsü.
Laisa lanurtem dang iba maongka agitsü aser sector balala- hospitality, woodwork, automobile, customer care executive amala nung teka mapa balala shia akumtsü ajungshi. Iba atema India sorkari angati tenüng züluokdaktsür.
Sentong nung Block Programme manager, BMMU Niuland, Kheboto Chishi-i power point ajanga NRLM Block Niuland osang metetdaktsü aser Thulun SHG nungi züngsemi par telok mangdang lemsatepa liasü. Sentong nungsa Hovishe yimdak nungi tetsürtemi sobaliba ken ka ajanga shilem agi.
Iba sentong ya Nagaland State Rural Livelihood Mission, BMMU RD block Niuland-i ayongzük.
Sentong nung GB union Presidents, kaketshir tentettem nungi aser yim balala nungi SHGs teloktem nungi züngsemtem aden.