Nüjiso atema NE telungpur teloktem longjemtsü akok

Guwahati, December 03 (Agencies): Northeast India nung peipei state nüjiso atema Meghalaya nung Garo National Liberation Front (GNLF) telok dak alaka Northeast nung aliba telungpur telok ajak sangküm United National Liberation Front of Western South East Asia (UNLFW) sabang nung longjemtsüa akok.
SS Khaplang-i aniba küm ana tain telok, UNLFW nung ya tang National Socialist Council of Nagaland (Khaplang), United Liberation Front of Asom (Independent), National Democratic Front of Boroland (Songbijit) aser Kamtapur Liberation Organization (KLO) teloktem lir.
Ano külen Meitei telungpur teloktem Coordination Committee (CorCom) kübok lir. Meghalaya, Garo Hills nung GNLA teloki Ulfa-I den amalitepa inyaker, saka tang tashi nungbo par telok ya kecha teloktep nung dena mali.
NE tesem nung telungpur telok ajak longjemtsü atema Ulfa-I ‘military chief and vice-chairman’ Paresh Baruah-i achaayanga liasü.
Osangbener dang Baruah-i, “Sangküm küm tetenzüklen tashi nungbo onoki telok ajak UNLFW küboki bener arutettsüla. GNLF adentsü atema tang tashi nungbo melemtet,” ta metetdaktsü.
UNLFW telok ulushitsü atema sentong aliba ya ajanga tarutsü nung NE tesem nung telungpur inyaksangshi bulutsüa akok ta sayur. Iba ya ajanga tesem nung, talisa sangküm assembly election agitsü aliba state Manipur nung security forces nem khuret tali agütsütsü akok.