Nuklutoshi-i Angh, ACAUT aser MTLT anema jembiba meyipa agir

Kohima, December 3 (TYO) : November 29 nü Kohima nung NPF CEC senden amendang PWD (National Highways) Minister, Nuklutoshi-i Angh P.B Acharya aser ACAUT o Mokokchung Town Lanur Telongjem (MTLT) dak tai tonglokja o jembiba onüktem meyipa agiogo.
MTLT-i Minister Nuklutoshi dang nungi kulitem meshia shidi züluba sülen anogo ka lir, pai osangbener senden ka nung ashiba agi, “Anghji ozüng ketdangsür ka lir aser Angh-i ochimashi azüoktsü atema inyakba mapa nung ni ashishitepba kecha mali, saka sorkar senzüsenbongba nung sen kanga endoker.”
“Angh-i yimtsüngtem semdangba aser nübortem khurettem metettsü merangba mapaji pela agizüker, saka senzüsenbongba nung telatetba kar lir aser iba nung ajemdaker dang ni Angh dak sendakba onük jembi. Ni Angh anema tebilemba kecha mali aser Angh tajungtibaji pa südaktsünür” ta Nuklutoshi-isa shisem.
“Angh-i ochimashi anema mapa inyaker süra, ni ibaji anema menoktaker. Ajisüaka, yimtsüngtem jaokba sülen ang Angh-i semdangtsüla” ta paisa shisem
Pa ainlen senzüdang MLA temi pa memeiner ta tawa Angh-i jembiba olen atema Nuklutoshi-isa ashiba agi, “Angh-i pa yimtsüngtem sema senzüba osangji MLA tem dang mashir. Shitakba agibo pai tamasa Chief Minister’s Office nem osang sangoktsütsüla aser iba sülen osangji pei pei district nung MLA tem dang metetdaktsür.”
“Pai district tem semdangdang, onok maliba atema onok sasa nüma metangi bilemer” ta paisa ashi.
MTLT-i pa dang kulitem meshiba atema Nuklutoshi-i ashiba agi, tanü Naga loktiliba nung telemsa onsara adoka lir aser akhidang nungi tenteta aliba civil society temi Naga loktiliba atema mapa talila inyaktsüla
MTLT aser ACAUT nati kanga yakyaka mapa inyaker aser tashitait teloktem lir aser ni ibaji mejembisem. Ajisüaka, telok ka tashitait mesüra tashimait ta jembiba nungno ni aibelena mali.
“Naga civil society temi talila mapa inyaktsüla aser ACAUT o MTLT-i kanga yakyaka mapa inyaker, anungji parnok nem tenüngsang agütsütsüla aser pusema nungittsüla, saka mapa meinyakba civil society tembo derecognized asütsüla” ta Nuklutoshi-isa metetdaktsü.
“Kü tebilemba jibo mapa meinyakba teloktemi ACAUT aser MTLT dang nungi talila teyakyakba nung inyaktsü atema ayongzüktsüba liasü, saka ni jembipet asütsü akok” ta paisa shisem.