Nuklutoshi-i Longzung Mopu salang den anisüngzük ki ka semzüktsü

Dimapur, November 14 (TYO) : National Highways, Mechanical & Election Minister, Nuklutoshi-i November 11, 2015 nü Longzung Mopu salang den senzüsenpongertem anisüngzükba ki tajung ka Chuchuyimlang Longzung mopu nung semzüktsüogo.
Iba sentong nung Nuklutoshi-i o jembidang, “Iba Ki yanglutetba yagi asen kiyonger tali putepa longjema lir ta sayur. Bendanglen Longzung mopusangertem sorkar nungi teyari masüngdangi dang kibong shiai pei akokba yari tenla agütsüba ajanga iba ki yanglutetba ya nüpurtem matsüngdang tatishitsü tulu lir,” ta ashi.
Iba ki ya asenok asoshi dang masü saka senzüsenponger ajak anisüngzüka anentettsüsa yanglutet nung kanga pelar, ta paisa shisem.
Sentong nung tetushi süa jaoker Agriculture Director, Bendangyanger-ia o jembidang, kiyonger ano tali telongjemba nung putepa alitsü tayongzükba agütsü.
“Koda obala aser ojala nungertemi sobaliba tajung wazüka tokjalir, itemji mesendoki tali akangshia kati ka tushitepa alitsüla” ta paisa ashi.
Iba sentong nung mendenji Deputy Mission Director SSA, Tali Jamir liasü aser Secretary Health & family welfare Senti Ao-i tajungshi o tatsüka jembi.
“Oboula aser otsüla nungertemi Tsüngrem tenzüka aruba ajanga tanü asen mopusanger iba temoatsü asenok angur. Anungji asen Tsüngrem tali akhümtsübua tila akümtsüla” ta pai ayongzük.
Sentong nung I. Sungit Longkumer ajanga melepzüng o jembi aser ki indang japi Longzung mopu president nem Minister ajanga amokja, parnok nem teti asoshi bendanga agüja sentong tembang.