Nuklutoshi-i ‘Narendra Modi and Naga Peace Accord’ kaket sayatsü

December 2015 nü Hotel Japfu Kohima nung Minister Nuklutoshi-i ‘Narendra Modi and Naga Peace Accord’ kaket sayatsüdang agiba noksa angur.

Dimapur, December 13 (TYO) : December 13, 2015 nü Hotel Japfu Kohima nung National Highways Minister, Nuklutoshi-i ‘Narendra Modi and Naga Peace Accord’ kaket sayatsüogo.
Iba kaket ya senior journalist aser North East Press Service yimozülur, Okenjeet Sandham-i züluba lir.
Iba sentong nung Nuklutoshi-i o jembidang Naga yimten tebilemtsü indang kaket züluba atema kaketzülur nem tenüngsang agütsü aser kanga tasü itta züluogo ta ashi.
Tenangzüktep aika agitepaka Naga nunger tsüngda telongjem maliba ajanga tamakok dang angur. Anungji asenoki nübortem dang ‘Telemtetba atema Telongjem’ yimyim angatetdaktsütsüla. Asenok melongjem tashi Naga nunger yimten tebilemtsü asoshi telemtetba magitettsü aser asenok putu tamajung ka nung alitsüsa akümtsü, ta Nuklutoshi-isa ashi.
Paisa ashiba agi, Naga nungertem anemsü medeni meimteptsüla aser asenoki yamaji inyaktetra asenok longjemtettsü.
Sentong nung Kohima Press Club President Xavier Rutsa-ia o jemibang Okenjeet nem tenüngsang agütsü.
Pai Naga Yimten Tebilemtsü indang kaket ka zülutsü mangdang ayuba tanü asangsang nung atalokogo, ta Okenjeet-i o jembidang ashi.
1929 nungi Naga Yimten otsü tenzükba indang osang lemsatepdang Okenjeet-i ashiba agi, Naga nunger India sorkar den yimten ken o lir aser asenoki iba otsü shitakbaji alima dang sayutsüla.
Sentong nung mendenji Rita Krocha liasü, Evangelist South East Asia Rev.Dr.L.Tsanso-i temoatsü meshia sarasadem aser Xhaveo Koza-i anküp tepela o jembi.