Nuklutoshi-i Phesama anentsüh aluba tesemtem semdang

Dimapur, August 24 (TYO) : Hombarnü National Highways, Mechanical Engineering, Minister Nuklutoshi den I Himato Zhimomi, Commissioner & Secretary, Works & Housing aser Vikedosie Kehie, Chief Engineer, National Highways nungertemi Phesama nung anentsüh aluba tesemtem semdangogo.

Iba anentsüh ajanga National Highway (NH) 29 nung metre 200 shi jungnüa raksatsüogo aser HW tsünglanglen alutem den 30 shi raksaogo.

Tanü Minister Nuklutoshi-i Phesama yimertem aser temeket nung aliba yimertem timtem ajuruba atema sasa bilemtsüba ashi.

Paisa BRTF ketdangsertem – Col SP Yadava, Commander 15 BRTF, Sachin Kumar, EE, Officer Commanding 89 RCC, Zubza aser PK Singh, AEE (C), 89 RCC, Zubza nungertem dang mapa inyakba osang metetpela aser tekaratiba nung NH 29 nung traffic senzütettsü atema inyaktsü ayongzük.

Nuklutoshi-i NH nung anentsüh alua aliba tesemtem sema senzüba sülen tantsü-tambu aser lanurtem den ajurutepa sensaksem.

Tang ya Chief Minister TR Zeliang Delhi nung oa lir tanü Nuklutoshi-i phone ajanga pa dang Phesama yim nung aser NH 29 nung anentsüh ajanga timtem tulu ajuruba osang metetdaktsü.

Paisa Village Council aser lanurtem dang anentsüh aluba noksatem agitsü aser itemji Home Department dangi abentsü asoshi tebilemba lemsatep.

Anentsüh alua aliba tesemtem nung yaritepba atema Nuklutoshi-i Phesama Youth nem Rs 20,000 aser Phesama Village Council nem Rs 50,000 teyari agütsü.

MLA Er Vikho-o Yhoshu, Kohima SP Joseph Hesso, BRTF ketdangsertem aser Phesama Village Chairman o lanurtemi National Highways, Mechanical Engineering, Minister Nuklutoshi meina senzü.