Nükpokertem asoshi football Orientation Camp alitsü

Dimapur, January 23 (TYO): Kochi, Kerala nung aliba angati teyari agütsüba telok, Society for Rehabilitation of the Visually Challenged (SRVC)-i ajungkettsüba, Indian Blind Football Federation (IBFF) ajanga India nung aliba Paralympic Committee den longjemer linük nung B1 Blind Football ajungkettsü asoshi sentong balala inyaker.
National aser International level tashi tonga tutettsü asoshi IBFF ajanga linük nung tenük agi junga mangurtem nem teyari aser tesayuba balala agüja arur. India indang Blind Football Team ya alima nung rank 23buba nung lir.
IBFF ajanga India nung mezüngbuba Blind Football asayamung ka Shillong nung 2017 January 27 nungi 29 tashi ayongzüka alitsü sentong lir, aser iba Tournament nung Shillong, Tura, Aizwal, Guwahati aser Kolkata nungi telok pungui tokteptsü.
Dimapur nunga Blind Football Orientation Camp ka January 30, 2017 nü, Don Bosco Hr. Secondary School, Dimapur nung alitsü.
Nükpokertem teyariteper-i anir arua iba sentong nung shilem agitsü jaoker.
Dimapur dak alaka tesem balala nungi iba sentong nung shilem aginürtem January 29 nikongdang mesüra January 30 anepdang 7:00 ako nung iba tesem arua atongtsüla aser parnok anisüngzüktsü asoshi AIDA Don Bosco-i agütsütsü aser iba sentong nung adentsü asoshi tesem balala nungi arurtem nem parnok aruba Bus/Sumu ticket jenjang sen meyiba agütsütsü.
Iba kasa sentong nung anepdang 11:30 ako nungi nükpoker kentener shimba sentong-a agistü. Iba sentong nung shilem aginürtemi Special Olympics Nagaland (SON) contact: 9863277878 / 8131923697 nung tongtepratep nung ajungstü.
BLIND FOOTBALL GAME indang temetettsü kar:
Blind Football ya Futsal ama asayadak moapu tasazük 40 M X 20 M nung asayar. Iba asaya nung goal keeper, goal guide aser coach bo tenük junga alir asütsü aser tanüngba asayar ajak nükpoker tang alitsü aser parnoki coach aser goal guide teyari agia asayatsü.
Parnok asayaba ball telung nung tsüngtsüng inoka aliba ajanga parnoki iba ola angaa asayar.
Goal guide aser coach senzütsü asoshi tesem latetja lir aser ball asayaba mapang nung tang parnoki ola adoka tetuyuba agütsütsü melar.
Iba asayaba mapang asayartem metsükteptsü asoshi ball rakzüktsü aosangi “voy” (ni yangi lir) ta mapang shia ola adoktsü.
Kobi melie Blind Football Academy ya Kochi nung mezüng lapoktsü aser iba asaya nung sempet aketertem bushiteta anir arua iba reju nung tesayuba balala agütsütsü.
Iba sentong ya Tata Trusts aser West Communication-i teyari agütsür. Iba sentong tali jangja metetnüra www.BlindFootball.in nung angutsü.