Nükshiyim ta ser Ao yim tasen ka kümogo

National Highways, Mechanical Engineering & Election Minister, Wb. Nüklutoshii Nükshiyim akümba temaitsü nüngshilung ka azüngtsür külen külem medemer aser yimten yimsüsürtem den tangokba noksa nung angur. (Nükshiyim, August 29, 2015)

Nükshiyim, August 29 (TYO): National Highways, Mechanical Engineering & Election Minister, Wb. Nuklutoshii Honibarnü yim tasen ka tenüng agi Nükshiyim akümba temaitsü nüngshilung ka azüngtsüba den külemi par yim senden kilem tasen asüba ka dena lapoktsüogo.
Iba yim ya tebu Yaongyimsen dang asüngdanger akümba yim ka lir. Iba yimji taoba mapang Yaongyimsen Compound ta ajabato lir. Joko Nükshiyim ya zünga Yaongyimsen nungi razüka aoba yim ana asütsü. Taoba küm ishika jakdang Liroyim ta ser ka kümogo.
Wb. Nuklutoshii tanü iba sentong nung tongti tesemdanger o jembidang, yimten nung mepetmesü timtem aliba ajanga mapang talangka state sorkar shirangogo aser tang ang tera shia aruba mapang ka lir, iyongji terenlok maparenji imlaba ama meinyaktet saka tang amai dang ora terenlok maparenji inyaktettsü imlar ta paisa tesasaba o ka ashi.
Asen lima terenlokji arutsü, aji saka, tang yabo akhi ama mapa meinyaki kecha mangur, anungji, mapaji meranga inyaktsüla aser kodang mapa meranga inyakdir idangji dang asenoki tangar meneptsü aser nüburtem yimjiyimjung nung alitsü ta paisa tayongzükba ka agütsü.
Iba kasa sentong nung Nükshiyim Village Council chairman T Yashii tarurtem ajak pelaa agizük. Putimeren GB-i Nükshiyim indang tatsüka ashi. L Yanger Lemturi community hall asüba osang tatongi ashi. Yaongyimsen Kosasanger Tatar village council chairman-ia mapang tatsüka agia jembi. Nükshiyim Baptist arogo pastor M Repai temoatsü meshia sarasadema aser Yaongyimsen Baptist Arogo Pastor Chuba Aieri tenüngsang agüja iba sentong shibang.
Kasa anogo nung tongti tesemdangeri Wb. Nuklutoshiisa Yaongyimsen pur yim süngküm tasen yangluba ka dena lapoktsüogo.