Nükti Rongbang zülusang Tesayur, T. Senka Ao (Alokba) tang kanga pelar

Kaket ka zülutsü mesüra ken ka mejemtsüji temela masü, saka asen Aor-Aotsürtem Tsüngrem-i kanga meima kaket zülur aser ken mejemer jenti adokdaktsüogo, aji oda parnok ajak nem tepela tenüngsang agütsür aser maneni nubor ajangzüktsü mechi pei pei sempet aser shisatsü maneni lemsatepdaktsüner.
Item shisabener aika rongnung okola T Senka Ao, shiba dang ajaki “Alokba” ta ajar, kechiba süra, kodang Alokba ta südir pa ya shiba, koyimer aser kong alir ta asüngdangtsü menüngdaker kechiyong paji Aoer ajungai pangpet süa meteta lir. Pai züluba kaket aika ni züngogo aser item kaketji mezüngmaner sernung memeteti züngmarsa alir, kechiba sera kangasa jangratemtsü tesa. Item kaket ajak rongnung tang tatemsa kaket ka “Nükti Rongbang” (The Journey of Mokokchung Town”), koba Mokokchung kümer küm 125 mong nüngtem nung sayaogo, iba kaketji tesüngmangtsüka aser temenungratsü. Iba kaket züngyonga maodang okola Limawati Longchar, shiba Mokokchung Town chanu ka lir, pai omasa züluba nung kanga abensatsüogo. Iba jagi iba kaket ya kanga tapensaba kümdaktsüogo.
Nia Mokokchung Town chanu ka, idakji soa inteter küm 40 tashi Mokokchung nung lir, tang Mokokchung atena or küm 10 shi alir. Ni Mokokchung alitang nia Mokokchung aser Ao lima atema terabo meteta lirama bilemogo, saka koba kaket Nükti Rongbang azüng ni meteta aliba ajungato tazüngla kümadok, kechibasera 1890 küm nungi Mokokchung Town kümteta aruba, maparen balala nung koda tenzüka renloka aru, itemji angazükdang wah, yamai aru asüana ta peria angatetdaktsü. Iba kaket nung Mokokchung Town nung kiyong (Ward) 18 tenüng ajunga tetezü, tangar oshi nung jatetba tesem kar, Faltu Line aser Khasia Line, Mokokchung kümer nubortem Tzü jema aruba Tzübo koba tanu tashi lir Musafir Tzübo, Brahmin Tzübo, Dhobi Tzübo, Tzüsen Tzübo ano Mokokchung Town nung lemang tongtipang tenüngtem Imnameren Road, Lukesosang Road, Dr Imkongliba Road amala tetetzü tejangja den koda ser item nüngjatem agütsü, item ajakji kanga tang rajema zülua angudang kanga tang menungraseta item tesemtem ajak nung tetsüng ajemoka senzür ama bilemogo.
Iba kaket nungsa Mokokchung Town Shisaliok(Education) koma tenzük, tesangwa(Electricity) koma bener aru aser Mozüki (Hospital) koma tenzük, itemji azüngdang asükjang meronga menungraseter. Iba denji alia Aiatai Mokokchung 27th December 1994 koba ni lia atalok iba otsüji züngshidang memeteti tenük nungi nüktzü jenzüka alu aser asükjang meronga tsubuseta bilemtet. 2003 küm NSCN(K) telok dang nubortemi maremteti parnok tesep atsüngdokba aser 2007 Ao Kaketshir Mungdang ajanga Survival Mokokchung tenzüka illegal Bangadeshi migrant ket nungi nübor wazükba item otzütem tatongi rizünger nubor nem agütsüba kaket ya tesüngmangtsü aser kanga tang senti. Iba kaketya senti rongsen dak nungi kanga agi taoba. Ao senso ajaki iba kaket ya bushia azüngtsüla, ajioda sera senso shiai pi lima yimdangi arua ano tali temiemba akümtsü aser memeteti Ao mulong Mokokchung Town alima nung yimti tajungtiba ka kümtet.
Nübor Molungdangtsü iba ama kaket ka zülutsüba ya temela masü saka okula Alokbai alima asoshi senti rongsen rizünga yutsü nung kanga dang pelar. Tsüngremi ozü tesayur alima asoshi arishi aser taküm tajung moajangma.

Imtiakum
Public Prosecutor, Kohima.