Nun kati tanur asoba jilushi nokdangtsü Arogoi akhanger

Mumbai, October 03 (Agencies): India nung Catholic Church-i ‘Agnes of God’ play nokdangtsü takhangba agütsüogo; American playwright John Pielmeier’er jilushi ka nung nun kati tanur ka tasü asoba jilushi lir, aser ibaji taküm piyong asüngteta alitsü nangzüker putir aser nun tem den meputep, ta parnoki ashi.

Catholic Bishops Conference of India (CBCI)-i, “iba jilushiji ajanga taküm piyong kibong mekümi asüngteta alitsü nangzüker Khristan lakh aika taküm den mapet sayar,” ta ashi.

“Iba ya ajanga tamangba yimsü melung yirutsür, anungji iba jilushi nokdangtsüla ta onoki Chief Minister Devendra Fadnavis aser tanga Chief Minister tem dangi shidi züluogo,” ta Catholic Secular Forum (CSF) general secretary, Joseph Dias-i tanü Mumbai nung osangbenertem dang ashi.

“Iba jilushi ya tamalen Vagina Monologues yanglurtemi yanglu. Parnok ya Khristan tem masü aser parnoki Arogo medendaktsüba dang masü saka Arogo den-a masüngdangtep. Iba jilushi ajanga nun temi taküm bendanga agütsüba nung tasüngdangba ka arur,” ta Dias-i ashi.

Linük nung Catholic Bishop tentet, CBCI-i Union Home Ministry dang, iba jilushi ya linük tesem ajaklen nokdangtsüla, kechiyong iba jilushi ajanga Khristan tem tamangba yimsü teratet tai agütsür, ta shidi ka ajanga mepishiogo.

Iba jilushi ya, US nung nun kati tanur asoba sülen lai, la tasüngtet aiür aser iba tanurji tebur den memedemi abenba ta ashiba nung ajemdaker yangluba jilushi lir.