Nungdakba mapang agia nuclear senden amentsü renema lir: Zarif

Vienna, July 13 (Agencies): Iran-i nungdakba mapang agia alima tashi abenba linük lenirtem den nuclear senden amentsü renemba osang ka Iran Foreign Minister, Mohammad Javad Zarif-i tanü Hombar nü metetdaktsüogo.

Iran aser alima tashi abenba linüktem nati küm 13 tejaklen nungi tenzüka benshia aruba nuclear ken o tembangtsü nükjidong nung nuclear tezüngzüktep agitsü asoshi latetba mapang atongtsü ghonda ishika anünga alidang Zarif-i iba olenji metetdaktsü.

“Nuclear tezüngzüktep tembanga agitsü asoshi latetba anogo aser mapang tali talangba küma atsülangshitsü nungdak madoktsüla. Ajisüaka, yamaji inyaktsüsa kümra, ozü Iran-i nungdakba mapang agia nuclear senden nung shilem agitsü renema lir,” ta Zarif-i tanü nenshia ashi.

Iran aser alima tashi abenba linük lenirtemi tan tesüsa hopta 2 dak tema agia senden amenba sülen Iran den sentakba nuclear tezüngzüktepji tatem küma agitsü asoshi tanen makai teinyakdak lir.

Iran-i atomic bomb densema tongpang nung amshitsü nuclear osettsüset meyanglutettsüsa par linük den nuclear tezüngzüktepji agitsü asoshi alima tashi abenba linük lenirtemi alizüng tulu yua lir.

Iran-i par nuclear sentong taruba küm 10 tashi anentsü nangzükba melena United States, Britain, France, Russia aser China den külemi Germany densemba P5+1 teloki Tehran anema benokba tenokdangbaren agientsü renema lir.