Nüngdakra ano surgical strikes aotsü: Army Chief, Bipin Rawat

New Delhi, January 13 (Agencies): Tanü Army tongti tasenba, General Bipin Rawat-i, tensa ajanga nüngdakra Pakistan len Line of Control (LoC) nung ano surgical strikes aotsü, ta metetdaktsü.
Delhi nung osangbenertem den jembidang Rawat-i, “Tensa ajanga nüngdak adokra surgical strikes ji asenoki inyaktetba mapa agi sayuba ka lir,” ta ashi.
Army tongti mapa agizükba sülen tang mezüng osangbenertem den jembidang General Rawat-i, “Tawatanü ceasefire alema inyakba ajema kümogo, ajioda mesüra onoki ano surgical strikes aotsüa akok,” ta ashi.
“Arrtsü adena aittsü aiben meranger. Yakünü Poonch (Jammu and Kashmir) nung aliba Line of Control nung kiralongrar ana kahset,” ta General Rawat-i ashi.
“Ajisüaka security sepaitemi meranga inyakba ajanga onoki Jammu and Kashmir tensa azüoktetogo,” ta paisa ashi.
Yaküm September ita nung surgical strikes ji kechiba ao’ar asenoki ibaji angatettsüla ta shia Rawat-i, “Surgical strikes nükjidongji angatettsüla, tangalen (Pakistan) nungi asenoki nükjidongji shitak mangatetra, arrtsü adena aitra ano surgical strike aotsüla,” ta ashi.