Nüngdakra India-i nuclear tangatetba melenshitsü: Rajnath

New Delhi, August 16 (Agencies): Hokolbarnü Union Defence Minister, Rajnath Singh-i BJP lenir aser taoba mapang Ato kilonser, Atal Behari Vajpayee sür küm ka ajungba anogomong nung asür bilemteta Vajpayee’-i India nunger nuclear programme tajungba akümtsü atema inyakba asoshi tetushi agütsü.
Rajnath-isa, nuclear onük nung India tangatetbaji ‘India-i tama nuclear mamshitsü’ lir, ajisüaka tarutsü nung nüngdak dang süra iba tangatetbaji melenshitsü, ta metetdaktsü.
Rajnath Singh-i twitter ajanga, “India linük ya nuclear tashi aliba linük ka akümtsü atema Atal-i telemtetba agiba area ji Pokhran lir, ajisüaka linüki tama nuclear mamshitsü tangatetba nung nokdaka liasü. India-i iba tangatetba nungsa nokdaka lir, ajisüaka tarutsü tia nung ajemdaker iba tangatetba melenshitsüa akok,” ta metetdaktsü.
1998 küm Atal Bihari Vajpayee Ato kilonser asüba mapang nung India-i nuclear tendangba tesem, Pokran semdangba sülen Defence Minister-i iba o ya jembir.
India ya nuclear tashi aliba linük ka akümtsü atema inyakba asoshi Vajpayee dang linük sentsüh lir, ta pai ashi.
“India nuclear linük ka akümba ya iba linük nung senso ajak nüma atangtsüsa lir. Atal mapa atema linük sentsüh lir,” ta Rajnath-i twitter ajanga metetdaktsü.
Singh-isa twitter ajanga pai Pokhran semdanga taoba mapang Ato kilonser, Vajpayee nem akhüm agütsüba noksa ka lemsatep.
“Tanü Pokhran semdanga taoba mapang India Ato kilonser aser India nüchiso anguba sülen takutet lenir rongnung ka, Atal Bihari Vajpayee nem pa sür tang mezüng küm ka ajungba anogomong nung asür nem akhüm agütsüogo,” ta pai lemsatep.