Nüngja Ratet Shilem-5

–  A. Maong Aier Retd G/T, Alongmen Ward, Mkg.

Nüngja ratet ya tenzükli tenzükadokerji ano maneni nüburtem tajangzük ngudisü ta bilema shilem 5 buba adokja tempanger. Mezüng shilem adokdang meshisatetba aser shisatetyonga makokbatem ano kanga süngjema shisadanger adoktsür. Iba shilem nungiang tongtipang olong teratet lir asü nung, tamang ka-a züngdaktsüner. Mezüngbuba nung nüngja khar tetezü meteta aliyonga, teratet teyudang repsema ashinungang rajemtsüsa aliba agi itemji tama tuyur.
1. TEMETETER: Nübur khari mapa tasen khar pei sasa purateta inyaker takok anguba
2. TASHIR: Temeteteri sayuba angazüka tashir akümba
3. MISHI: Soruchiokdang long taju asem azünger iba ma nung chipu anpu aser songopu dongdaktsü atema long asem yagi mishiba agi yamai jatet ta kaket ka nung züngshi. Ano asenoki long asem ya azüngdang tamasa iba tesemji merakmeraka meshiteter azünger aser nokbang agi akang akanga ajenshir ano tanaben meshiteter agi yamaji aja alitsü.
4. MANGKOCHITEM: Iba ya remshilu achiba shirurutem dak dang poknüng shilem nung lir. Temang nung takolak aliba mesük aser iba ya rangmara chi atemba sala ama asüba agi.
Nüngja ratet dang teyua alibatem
1. Tongnüsen: azüngtsü (dew) nanaba mapang anüla nung tongita anguba aser asenoki iba jakdangi ora, sena sena dang oadokba agi.
2. Morok an bung (ozü ka nüngja): iba mangya mi agi morok ama tezüngji penja penjar aser anitbung mesükba agi.
3. Süngshi: iba sung aser tera teküp shizüka achiba agi.
4. Koya: oshi adokba mapang iba shiruru ya aika pokteta liasü südi. Eyongji kong nungi ya ta jembiba agi yamai jatet ta rateter.
5. Züngi: zünger tezü züa oa adangba agi.
6. Mendi: Di Tet: jendi. Iba nungi tejang jendi (aika) mendena taren sena aliba agi.
7. Au: ana küma aumatetba agi.
8. Omok: iba ozü yangi mudongtsüngta om-om ta asa-a senzür aser anogo aben moka dang kazüba agi.
9. Alutemtem: iba ozü yagi tsük achir asünung aluru mapang alu sünga temdena aliba agi ta rateter.
10. Manga: iba ya anü anüa asen meinpronga yimzür. Aridok yonga mangai dang arua asen meinpronger, iba jagi yamai jatet südi.
11. Mersü: iba ya kanga tashi asüba agi lon süa achidang tebang amer. Mer=amer, sü=lon asüba
12. Mezü: iba shiruru ya tamasa angudang kanga süsü-süsüa anguba agi mesür arua mesüdangnüa bilemba nungi yamaji jateta alitsü akok.
13. Waro: iba ozü yagi wak, wak ta asa yima aruba agi yamaji jatet südi.
14. Shirem: iba shiruru yagi tamasa kechi inyaktsü shisateter ibaji dang temulung nung rema ayur. Tet: angutsü bilemtetra tangu dang angutsü, anaktsü bilemtetra tanak dang anaktsü aser tajentsü bilemtetra tajen dang ajentsü. Tet: shisateter rema ayuba ta rateter.
15. Ninang: ajak anidener teseb nung nangdena ayu ama aliba agi.
16. Nati: Ti Tet: tulu, Ninang tulu
17. Benjung: takaba ajak bendena kadi ka den jungtepa chia jema amongba.
18. Kuzu: iba ya atangtsü mapang tepetchi to pukmaa salatsü aser iba salabaji ku ama saraa sangzüka alutsü. Iba sülenji ku mesükba shia iba jang ya züdena züdena atangba agi ta rateter.
19. Atang: tangieta ayu ama tetsübutsüka anguba agi
20. Longren: long taren sena atongtepa tua aliba agi.
21. Lenden: ali tomosüng khar aliba ajak nok agi lendena ao ama tesem asüba agi.
22. Tenem: Nemdena nemdena atu ama (tenemdem) asüba agi
23. Tarok: taoka yia (rokboka) ali ama asüba agi
24. Wapetsa: Nok agi wapet ama motongtaka masü, lendensa masü (yimjua) aliba lenmang mesüra tesem khar yamaji adeshia jatet südi.
25. Logkhu: Lenmang agi longpanga khuoka longa aoba agi
26. Mochi: Chi amai modak modaker asüba agi
27. Mojing: asen oshi olong aika nung ‘MO’ tapu lir. Saka ‘JING’ yabo ibai dang amai. Tet. Ajidangyunga mangur. Aji mesüra mopungden repsema jenshia senzüba agi taka rateter.
28. Pungmang: asangsang nung atalokba ama kasa mopungla nung mangdang anguba ta ang rateter.
29. Ango: tzü nung juzüa anguba agi iba nüngja ji agi südi.
30. Azük: iba ya ang nung retener tokong nung azük dang nung azü azüa anguba agi nüngja-a aji dang agi südi.
31. Süsang: Iba shiruru ya süngdong nung senzüdang teben to sü sangzür ama anguba agi ta rateter.
32. Mer: Iba ozü yagi yimzüdang, la yima oya aliba lenmang to jet ta dang paidoker merayima oadokba agi ta rateter.
33. Yimchiyimjung: Yimer ajak kaa-itta chia jema jungtepa aliba agi
34. Mongpu/sumomo: Onoki mongu ta jembir. Iba ya ka dang achi nung tebok süngadoker mongmunger. Tanabubaji solasolar aser mudakmudaker ta rateteter.
35. Kapu: Kati ka den putepa aliba
36. Atongpu: Atongtepa putepa aliba
37. Atongtsü: Atongtepa putepa aliba tsür
38. Ilang: Itepa langteper ali ama putepa aliba tsür
39. Purmedemsor: Mapang anasatepa medema asor medemertem
40. Junglajungpet: Junga laa aotsü akok, lapetsüa akok (majungtsüa akok)
41. Yimlar: Yimdangi arua lahdanga ataba.
42. Oshioben: O shir temulung nung bena ayuba.
43. Ken: Tarutsü asoshi meimchirtem temulung atangtsü atema oren khar kenteta sayuba.
44. Salem: Temulung sadoka (salaa) lemsatepba.
45. Sarasadem: Temulung ajak sadoka (Sadem-sadema) Tsüngrem den jembiba.
46. Kibong: Ki-Bong, ‘Ki’ yabu nüngja ratet shilem ka nung metetogo. ‘Bong’ teratet ya bongzüka kibong mapa ajak bongzüka mesüra bongzüker (tenzüka) aoba.
47. Kilen: Ki temaket ajaklen
48. Kiyonger: Anasatepa aliba ki kar yonger ka nung rürtepa ama aliba agi.
49. Kidanger: Ki anasatepa aliba anaprongla dangiet tepa aliba.
50. Kiyir bejung: Apu ani külemi ki ka nung yia alitsü atema takaba ajak chiajema jungtepa amongba.
51. Kibalembu: Nüknürar ki ka nung külemi alitsü atema kidongren lembula asü melembula metettsü asadangba.
52. Kinüngtsü: Kidang nüngdak ajak nungita yaritsüla.
53. Kinüngbo: Kinüngtsü den putepa alisang.
54. Kiyimsang/Kiyimla: Ki ka nung külemi alitsü atema nübu ayimsang mesüra ayimla.
55. Nahpong: Nah-temang ajak peripshia (nahdena) pong-pungdenaba. Tet: iba shiruru yagi peladang temang ajak nahdena pongdener (pongzür)
56. Osen: Iba ozü ya Assam lima nungi khenkhen yima atuli luli ta asür. Eyungji mezüng ya angudang tanübo ozü tasen ka angur ta jembiba nungi iba nüngja ya adok südi. Ano aji mesüra iba ozü yagi o ashir aser asen den o jembiba agi taka rateter.
57. Süngkojung: Süngko-süng kolak (sung talak) Jung-raradang amshiba. Iba shiruru ya yima aodang jung mesüker aser sung kolak nung atemba agi ta rateter.
58. Kaket: Shitipak ishika bendener item ajak temang ka nung dang ketdaktsüba.
59. Süngkhu: Süngkhu tsüng ajak süng khuden mesük.
60. Khu: Oset abentsü atema khu ya kibong shia nübu junger atema kaka akhua daka lir. Iba jagi asenoki oset mashi ka benra khu abener ta jembir. Mesüra khu abendang asen mang ya terabu khuroka adokba agi taka ratet alitsü akok.

O Tembang: Nüngja ratet onük ya iba shilem 5 nungi temadoker. Anungji asenoki nüngja tejen mesüra tasen kar ratetdang ozüng 12 agüja aliba nung ajemdaker ratettsü merangdi. Saka ni mezüng ashi ama oshi ya sayatenya mapa Tsüngremi agütsüba asünung olong noklang shilem nung 20 dang ratettsü akoker. Tatishitsü agi, Laishiba kaket nung Lai tekong ka ‘Nenok tebelemer aser khu retta abener ajak Kü dangi arung, aser Ni nenok nem anisüngzük agütsüdi’ iba oren nungi olong 16 lir. Item nungi khu dak alaka tanga olong temjibo oshi shia metetba dak alaka ratettsü makoker. Anungji teratet ishika lemsatepaji tatem südi aser tang nungi danga oshiji shitak anagzüker mesamadaktsüi jembidi aser züludi ta shia kü onük tembanger.