Nüngsen agirtem

Nagaland tatar senden nung opposition mali, anungji government-i tai inyakba apur mali aser meshitaki inyakbatema nüngsen agia metongshitsür-a mali, pei sünütsü süa mapang kenpiga aruba sülen, Naga nunger tia ajung, tangbo tatar senden nung züngsem purtem rongnung opposition alidang inyakba dang tajungba aser tesashiba inyaker kija aser lokti karbo adoka lir. Ibayongjiang government-a terabo kümdangshiba angur aser nübortemia government-i meshitaki inyakba mapatem karbo metetter. Iba ama nüngsen agia, assembly nung opposition dang nungi tesashiba aser temerangba inyakertem rongnung ACAUT, NPRAAF (Nagaland Public Rights Awareness and Action Forum), NTC aser CNTC teloktem den ano S.T.Yapang aser Odi Jamir nungertemi nüngsen aremba dang masü saka nübo aser rongsen endok mesasai inyakba angur. Ibai auertem kanga bolua alidak azü tajung ayu amai lir. Item zütem jagi asangba ajanga auertemi auyar saka sademabo mauyatetter. Aji oda, item kija aser teloktem ya mali asübo Nagaland nung yimsüsür aser ketdangsertem ishika yagi Naga nunger nübortem ola madokdaktsüi zep ta alenbanga yurbo pei inyaknütsü inyakla. Item ama teloki government-i tim mesüi inyakba mapatem bushisüngdanga jungkai madoktsü asübo tang tashi asenok sen asem jenjang jang sen semer agi alia chiyonga lila, asenok gari nunga kerosene enoker senzüba agi timtem takoksa aiben ajurur lila, government mapai aitsü asoshi lanurtem nem  tanü agütsüba maongka amaia magütsüla, gari lenmanga tesem tesem nung terara yanglushian oa aliba ya meyanglushila aser government maparen nung senotsüa mapa meinyaki agizükpet agizüka chia lila. Atangji, tanga item kija aser teloki asayonga, kecha hau ta mali teinyakba aser techiba, anungji mashilen nungi aruba senotsü tera masem bo kidangi mounür. Nagaland nung ya joko küm talangka mapabo meinyak ser bill agizüka achibajiang tim amato jembiba sobaliba ka tenzüka lir. Iba sobaliba jagibo office-i anogo shia aoer  aser mapa jungjunga inyaker bill agizüka agiba menütsür. Ibaji parnoki shingaia meinyaktetba mapa tuluka inyaktet ama ulua bilemer. Iba sobaliba nung intetba agi, tanü Nagaland nung taintemibo mapa jungjunga inyaktsübaji tezüdanga bilemer. Iba jagi, lenmang aser kiojen meyanglu ser sen agizüka achibajiang mapa shitak inyak amai bilemer. Iba ama ochimashi sobaliba nungji arogo aser mongdangi dena shilem agir. Aji oda, yimtaklirtem kibong ishika tenüng nung yinjung meshir tenla ki yanglur aser contract aser supply mapa nung adjust süa arogo aser mongdang yaridaktsüba otsü aika ataloka lir. Iba amaji arogoing yimteni ochimashi mapa inyakba arütsütsü melen arogoiang yimten dang ochimashi mapa inyaktsü lenmang sayuba aiben atalokba angashir. Aji oda, tang tashi nung Nagaland nungbo government-a mali amai küma odaktsüba nung ya yimten yimsüsür aser ketdangsertem dang masü saka arogo aser arogo nungertem shilem tuluka lir. Ibaji angateta, asenoki asen lima yanglunüra tamasa asenok taküm aser sobaliba tamajungtem melenshitsü nüngdaker. Tangbo joko lanurtemi ochimashi mapatem anema ola adoker asünungji government nung alir taintema ajemajema melitettsüsa kümogo. Aji oda, kija aser teloktemi government-i inyakba mapatem metetnüa asüngdangba kija agi nübortem tuluka yaridagi ta nübortemi parnok dang kanga pelaa bilemtsüla. Assembly nung opposition aliyonga tang ACAUT, NPRAAF, NTC, CNTC aser S.T.Yapang o Odi Jamir nungertemi asüngdangba ama masüngdangtsü aser telangzüba shitak mangu tashi menokdaktettsü. Tamalen opposition alidanga government anema ola adokbaji pei kija ajangzüktsü inyakba mapa amato tatem metongisa anen. Aji oda, tanga opposition meliaka NPF purtem rongnung telok ana küma lemsar kibur akümtsü raktepba mapang, government nung maliba teloki goverment nung alir lenirtemi ochimashi mapatem kanga inyaka lir aser parnoki tashi mangara itemji kaktettsütsü ta dang shia lir. Tetezü, parnoki tashi anga nungbo ochimashi mapatemji tenembang dang nembanga yutsütsü. Iba ama tensa ka nung alima jungnüra teti nübortemi government nung alirtem anema opposition mapa inyaktsüla.