Nungthaang Tampak: NE nung mezüngbuba ‘100% Computer Literate Village’

Imphal, August 24 (Agencies): Manipur kübok Nungthaang Tampak yimtsüngi state nungdang masü saka North East ajunga nungi mezüngbuba ‘100 percent computer literate’ yimtsüng naroküm ngutetogo.
Iba training ya Mangaal Rural ta ser rural development atema inyakba NGO kati ayongzüka agi. Digital India program kübok shilem ka ama Mangal Rural-i All India Society for Electronic and Computer Technology (AISECT) indang computer course agi.
Nungthaang Tampak yimtsüng nung nütsüng yongsük 200 lir aser parnok rongnungi 180-i training program nung aden.
Nungthang Tampak-i India nung ‘100 percent computer literate village’ tanabuba kümogo. Mezüngbuba yimtsüngji Kerala kübok Chamravattom yimtsüng lir, ta Mangaal Rural Director, N. Surjit-i osangbener dang ashi.
July 24, 2017 nungi training program tenzük aser iba nung computer systems 4 den WiFi server ka aser master trainers 2 liasü. Item ajakji Mangaal Rural-i angati agüja yariba lir.
Nungthaang Tampak yimtsüng ya Churachandur district kübok lir. Iba yimtsüng nung kilen 45 lir aser nütsüng yongsükji 200 lir. Training tembangba sülen Surjit-i computer set den WiFi connectivity aser solar power system ka yimtsüng nem tenla agütsü.
Yimdaklir ajak training agitettsü atema anepdang 5:00 ako nungi class tenzük aser ibaji ayaterm tashisa agi. Tenlaki nung takdang ka classroom ama amshi.