Nüngtugu cartoon yanglur ka amokmeren

Guwahati, August 17 (Agencies): Assam nung nüngtugu cartoon yanglur Nituparna Rajbongshi-i Ato Kilonser Narendra Modi oxygen mask ka semer tanur tasü atsüketa yangluba noksa prokshiba sülen pa tepsettsüba amokmerena osang ka agizükogo. Iba cartoon ya Independence Day nung upload sütsü. Iba dak sendakba nung Rajbongshi-i Bodhbarnü state police nem ken o ka agütsüogo aser tekümzükba mishiogo.
“Facebook ajanga ni amokmeren. Anindya Pranay Bharati ta ser nisung ka shiba Facebook profile nung Goreswar College nung tesayur inyaker ta shia lir, pai ni amokmerenogo. Ni yangluba cartoon nung pai comment asüba nung kari ni akhatsüla ta shia lir. Ni Barpeta nung Sorbhog Police ket nung ken o ka agütsüogo aser police tekolakbai cyber crime department nem osang agütsüogo,” ta Rajbongshi-i ashi. Iba comment post sütsüba sülen pa sapurtemi pa pusema Assam police dang tekeraba nung iba tensa azüoktsü asoshi akhang.
Barpeta SP Shiladitya Chetia-i ashiba agi, “Iba ya kanga dang ken o tongtibang ka lir, onoki iba dak sendakba nung kanga junga bushisüngdangogo. Ken o dak sendaka aliba lenla ajak onoki junga asadangtsü.”
Pai yangluba noksa indang jembidang cartoon yanglusangi ashiba agi, “Ni noksa ajanga linük nung Independence Day pelatepa mongaka Gorakhpur mozüki nung tanur 68 oxygen maliba ajanga süogo ta shinüba liasü. Nisung mashikati ni aitsütsü akok. Iba amala noksa ajanga lokti nung ochimashi, teraksa aser tebendang aliba indang ni ola adoka arur. Ni amanger cartoon ajanga lokti nung tatalokbatem sayur.”
Rajbongshi-i iba osang agizükli pa sapurtemi pa pusema police dang tekeraba nung inyaksangshitsü asoshi akhang. Police osang ajanga ashiba agi, parnoki Goreswar police dang iba ken o reprangshitsü asoshi osang agütsüogo.