Nüngtugu kaketzülur, Jackie Collins süogo

Washington, September 21 (Agencies): Hollywood aser Mafia taküm libaliro dak ajemdaker tashishitsü aketba saka kaket azüngeri kanga dang jangratema azüngba kaket 32 tashi zülula, Jackie Collins arishi küm 77 tain lia taoba Honibar nü alima nungi pilaogo.
Collins ya mama cancer agi shiranga asü ta New York Times-i metetdaktsü.
Nüngtugu actress, Joan Collins tenu, British-America tsür Collins-i 1980 küm nungi tenzüka la masü tashi Los Angeles yimti nung lia aru.
London yimti nung October 4, 1937 küm asola, Jacqueline Jill ‘Jackie’ Collins-i ‘The World is Full of Married Men’ kaket mezüng zülu saka nungtugu kaketzülur, Barbara Cartland-i kasaji magizüktetba otsükaket ta shia, iba kaketji Australia o South Africa na nung meyokdaktsüi nokdang.
Ajisüaka, ashishitsü tenzükba ajanga Britain aser US na nung alirtemi iba kaketji raktepa alia azüngtsü tenzük.
Collins-i 2 buba kaket, ‘The Stud’ 1969 küm aser 3 buba kaket, ‘The Bitch’ 1979 küm zülua adok.
Ajisüaka, lai züluba kaket rongnung alimai kanga dang sapubaji Collins-i 1981 küm züluba ‘Chances’ kaket liasü aser iba kaket ya ozüng alema telok tentetba Mafia aser parnoki ozüng alema tashiyim inyakba dak ajemdaker züluba lir.
Lai züluba kaket otsü nung ajemdaker yangluba film aser Television series balala nung amshitsü atema Collins-i oren renemba osang jangjaogo.