Nüngtugu Rock kenetener Leon Russell süogo

Los Angeles, November 14 (Agencies) : Rock ‘n’ roll ken atener aser produce asür nüngtugu kentener Leon Russell Nashville nung süogo. Pa arishi küm 74 liasü.
Russell kinungtsü Jan Bridges-i, la kinungboji Nashville nung aliba par kidang Deobar aonung mejangba nungi mesak, ta sangdong ka ajanga metetdaktsü.
Russell ya taküm July ita nungang temulungjang bypass surgery agir liasü aser sangküm January tashi kentena tour jajatsü tebilemba liasü, ta lai ashi.
Pai tesüsa kenten sentong agibaji July 10, 2016 nü Nashville nung agi. Pa ya ken junga atenba dang masü saka tereprangnütsü nisung ka liasü, pa kuo temesüng teberem tom ka tashi alibaji tachinütsü ka aser iba kuo jagi pa tejak tesadang dak tali nembanger liasü.
“Chijiba tekolak nisung ka asenok dang nungi pilaogo,” ta Rusell indang guitar aser pedal steel atemsang, Beau Charron-i sangdong ka ajanga ashi.
“Leon Russell-i pa libaliro aser ken meimba ajanga musician aser pa sapur aika tebu ama liasü. Pa den küm aika anidakba ajanga ni tajangzük tajung aika nguogo aser pa asübaji ni atema tesayur aser tembar tajung ka mali akümer anungji ni temulung kanga raksar,” ta pai ashi.
Russell indang gospel-infused southern boogie piano rock, blues aser country ken meimertemi pa nem akhümtsübu agütsüogo.
Cat Stevens-i, “Russell ji ken zülur aser tangar ajungmesor tajungtiba rongnung ka liasü,” ta Twitter ajanga lemsatep.
Charlie Daniels-i, “Tesüngmangtsü ken aika toktsür ogo,” ta ashi aser Richard Marx-i, “tobur ajungba lemsateper rongnung khenyongi pa balaka liasü,” ta tweet asü.
1960s mapang producer Phil Spector-i sound tsütsü temelenshi mapa ka inyakba mapang Russell-i Los Angeles studio telok, Wrecking Crew atema keyboard temtsü. Pai Joe Cocker indang “Delta Lady” ken zülutsü aser 1969 küm Cocker indangsa “Mad Dogs & Englishmen” tour atema acha ayangtsü. Iba tour indang documentary film ka aser kensepa ana ta adok.
Russell-i kentener Bob Dylan, Frank Sinatra, Ike,Tina Turner aser Rolling Stones tem den ano tanga kentener aika nem music temtsüba den ken dena produce süja lir.
2011 küm Russell tenünga Hall of Fame ken zülur tarensen nung inoka liasü. Pai ano Rock & Roll Hall of Fame nungia Music Excellence atema award ka angu.
“Paji ni atema tajungmesor aser tesayur ka ama liasü,” ta Deobarnü Elton John-i Facebook nung post sütsü. Kena sentepa ‘The Union’ kensep adokba atema ni kanga pelar, ta pai shisem.