Nurse tem ghonda 12 inyakba ajanga manemer junga meyariteter

London, September 13 (Agencies): Mozü kidang inyaker nurse tem ghonda 12 tema inyakba ajanga tejangraba samaa mapa toktsünütsü aser ibaji ajanga shirangertem nüngdakba ama meyaritettsü, ta bushisüngdang ka ajanga ngutetogo.
“Europe nung mozü ki timba ka nung nurse tem ghonda 12 dak tema inyaker. Ajisüaka iba ama mapang talanglang inyakba ajanga parnok kanga anibelemer aser mapa agi lakadoker,” ta mongintemi ashi.
“Iba ama mapang talanglang inyakba ajanga nurse aser shiranger naprong nem timtem ang angutsür,” ta University of Southampton, Britain nung professor aser iba bushisüngdang nung author Peter Griffiths-i ashi.
Iba bushisüngdang mapang Europe nung aliba linük 12 nung inyaker nurse 31,000 dak tema inyakyim tendanga liasü.
Parnoki ashiba agi ghonda 8 inyaker dang nungi ghonda 12 dak tema inyaker nurse tem noklang nung shilem 50-i mapa agi alaker.
Mozü kidang Health manager temi mapa memelentepi ghonda12 dak tema inyakdaktsüba ajanga tajungba inyaktettsü ta bilemer.
Nurse temia iba ama mapang talanglang inyakba sülen sodi talang angur sen kümzükteter aser senzüsenpong kanga masür, ta ashir.
Ajisüaka manemer tsütsü nungi kodang reprangdangdir iba ya ajanga timtemang tali bener arur, ta bushisüngdang ajanga ngutetogo.
Iba tongutetba ya ‘BMJ One’ kaket nung adoktsüogo.