Nurse temji Tsüngrem mesük: Meghalaya Angh

Shillong, October 5 (Agencies): Nurse temi nüburtem anepaluba nung ajemdaker Hombar nü Meghalaya Angh, V Shanmuganathan-i, parnokji ‘Tsüngrem mesük’, ta ashi.
Shanmuganathan-i, “Nurse temji nisung ka taküm nung kanga nüngdak. Parnokji Tsüngrem amai akhümtsübur aser parnokji Tsüngrem mesük,” ta North Eastern Indira Gandhi Regional Institute of Health & Medical Sciences (NEIGRIHMS) asemnü amungba national seminar sentong lapokba mapang ashi.
“Nurse temi timtema alirtem aser nüngdaka aliba nisungtem dak rangloker inyaker. Shiranger aser timtemer reprangba mapang parnoki kanga aremzüka anepalur. Parnoki teyari nüngdakertem nungita anepalur. Nurse temi temulung aser shisatsü ajak agi bendanga agüja timtemertem anepalua yarir aser iba jagi parnok Tsüngrem mesüka kümdaktsür,” ta pai ashi.
Nurse temi mapa tajung inyakba tushia pai, Tamil Nadu nung aliba Kaveri ayongküm nunga nüburtemi külemba ‘Thaiyu Manavan’ tsüngremji (deity) nurse ka lir, ta ashi.
NEIGRIHMS director A G Ahangar-i jembiba mapang ashiba agi, institute ya tang nurse azüngertem asoshi jurila complex ka atar aser iba nungji tarutsü nung MSc aser PhD-a tenzüktsü.
Ahangar-isa, nurse tem nem IT tsütsü oset tasen amshiyim nung tesayuba peria agütsütsü nüngdaker, ta shisem.
Iba sentong nung state 22 nungi nisung 700 shi dena liasü.