Nüsasa ajemaluang

Asen taküm nung asen ajemalutsüba mesüra asükümtsübaji asen dak keta lir, anungji asen mulung. Ajisüaka, Laishibai ashir, “shibaisa peisasa uludir, pa tila kümdaktsütsü saka shibaisa peisasa tila kümdir, pa uludaktsütsü.” ( Luke 14:11). Atangji, alima nung ajaki tulur kümner aser akhüm aginer. Nisung ajaki ajak nem züngshidaktsüner. Aji oda, tangari züngshitsüsa ulutsübaji lenmang ana lir. Lenmang kaji alima shi tsütsü kija indang bilema ulutsü akok. Anungji, shibai Tsüngremi akhüm metsübui alima nung ulutsü indang bilemer, pai mesüra lai akok tashi tangar ajemzüka yutsür pei kija temai atutsüba, pei kija nüngtugu akümtsüba aser pei agitsü aser ulutsü indang bilemer. Atangji, khen atemabo item jagi takok angutsü, itemji nüngtugu akümtsü aser itemji kanga ulua angutsü. Ajisüaka, laishibai ashir, shibai ajemalu mesüi kanga ulunüdir pabo tila kümdaktsütsü. Tsüngrem amadoker, peisasa pei ulunertem Tsüngremi tila kümdaktsübaji komaka ilaa kümdaktsüdir na ta kanga tsübua bilemer. Aji oda, pei mulungjang nungbo temeim aser tajung kecha mali ser nung tangar tsüngdang tenüng agitsü asoshi temeim mapa inyaka sayuba, nübortembo memeimer ser nung tenüngsang agitsü atema mapa tajung inyaka sayuba aser tenüngsang agitsü atema lokti, arogo aser yimten tenzükba asüküm aser anemsü jakla agi asen taküm aser kibong mali amato küma ilatsüba indang Tsüngrem o agi ashir südi ta angatetter. Ano, pei taküm tangari züngshitsüsa ulutsübaji lenmang ka lir aser ibajibo Tsüngremi mulungba nung uluba asütsü. Tsüngremi mulungba nung uludaktsübaji ajemalu nungi tenzüker. Nisung ka ajemalutsüba ya alima dak aketba yimya ka masü. Ajemalu tetezü lapi, tasü mait aser tamajung dang majunga ta meshitetba, ajak nem mezüngmeshidakja aliba taküm masü. Aji oda, Laishiba (Zungdangba) nung alima nung ajemalutibaji Mosa liasü ta shia angutsü. Ano, Yisuia “ni ajemalur” ta shia angutsü. Aji oda, par adianu den raratepa alisang Egypt nungba tepsetsang to ajemalu Mosa liasü, par nübortemi süngyanglu külema ngur ain adoka Tsüngremi agütsüba ozüng longpak jaksasang to ajemalu Mosa liasü. Aji oda, Yirusalem tenla ki agi sen melenba aser shishilembaba ki kümdaktsür angudang ain adoka langpang ajak meküpdoktsür yangji shishilembartem ajak aridoksang to ajemalu asen kümtetdakba Yisu liasü. Aji oda, ajemalu Mosa Tsüngremi ulutsüba asenoki Laishiba nung angur. Alima nung ulutsüba aser ilatsüba ya Yisu Khrista taküm alidang asenok ajaki angatettsüsa  Luke 14 nung o entepba ka shia lir. Iba otsü nung nisung shibai pasasa uluner, pa mak asütsü saka shibai tila akümer tangari pa ulutsütsüba indang shia lir. Ulutsüba yabo nüsasa masü saka tangari kodang nü dak tajung reprangtetter aser naji ulutsü tetemsü ta angatetdir, idangji dang uludakjang ta laishibai ashir. Aji oda, kodang alima tsütsü na ajungketer, tenüngsangji nü kija agitsü saka kodang Tsüngrem nem na ajungketdaktsür, idangjibo tangar aikati nü taküm jenjang ngua Tsüngrem nüng asangtsü aser ano nü tenüng tali ajungkettsütsü. Tsüngremi mulungba nung asen ulutsü aser ajungkettsübaji lenmang ka dang lir, ibaji asenoki Tsüngrem akhümtsübutsüla. Asenoki Tsüngrem akhümtsübura Paia asenok akhümtsübutsü ta 1 Samuel 2:30 nung shia lir. Iba  Laishiba tapu nung shia aliba indang bilemdangdang, Tsüngremi akhümtsübuba nisung akhümjia kobatetka ulua alitsü ta kanga jangratema bilemer. Tsüngremi asenok ya alima nung tulur aser takar küma jangratema alitsü yutsü, kechiyong ali tema aser telong nung aliba rongsen ajak madak asenok kibur kümdaktsü. Ajisüaka, Tsüngrem nükjidong tongteta asenok ulua akümtsü atema asenok ajemalutsüla. Ajemaluba tetezü asen jakliro, ain apong, asüküm, mezümeküm aser tiaksangba jaklatem ajak Tsüngrem nem azüokdaktsütsüla. Asenok nisung meimchir yabo arem shiruru amato, mazüokra shinga nema teyari magütsütettsü. Aji oda, asenoki Tsüngrem akhümtsübua Pa nem azüokdaktsüdi aser ajemaludi. Idangji Pai asen ulutsütsü.