Nuso Ashiba

Saka item ajak tekangshitsü tetenzüker Mathi 24:8.
Khrista kodang meyiba arutsü? Putu ajak nung iba tasüngdangba kanga shisadanger. Khrista tangsa arutsü ta bilemba agi Khristani inyakba ajak tesülen atsüngzüktsür. Khristai Pa kodang arutsü mapang shidakji mashi saka saksalema alitsü tamaitsütembo pai ashi. Mapangji mejangja saka Pa arutsüji tejanga.
Tatalokba kar ajanga Pa arutsü mapang anasa lir ta sayutsü ta Yisui ashi. Idakji raraba aser raraba osang alitsü; ayawara aser menoknok alitsü; Khrista asoshi Khristantem rishikangshitsü; tiyazü ainkar arutsü aser tiyazü sayutsü, aika mashileni anitsü; ozüng raksar jenti adoktsü, nisungtemi pei nükdang kechi tajung aji inyaktsü, yimsüsüba menden nung alirtemi ozüng raksartem azüoktsü makoktsü, temeim mokonga akümtsü (Matt. 24:6:-12).
Tatem mapangji nüsotsü tekangshi ama alitsü ta Yisui ashi. Tanur asoshi tashitsü atuba tali tali akümer, aser ibai maremtetti atur. Rara mesüra ayawara mesüra tiyazü tesayur adokba tetezü Pa aruba asenok den lir ta Yisui mashi. Itemji tetenzüker dang lir ta Pai ashi. Khrista maru tashi rara, menoknok aser ozüng raksartem tali tali adoktsü ta Pai ashi. Tatem nung Khrista arudang item ajakji tatem akümtsü. Raratem, ayawara aser meimchir mepetmesü ajak tatembang kati arutsü. Yisui jembiba ajak asenok mapang nung ngua arur. Yisu arutsü asoshi khristantem saksalema atatsü mapang ka süra ibaji tanü lir.