Nutrition Week dak sendakba nung Tribal Food Mela agi

Dimapur, Rongjui/September 19 (TYO): Rashtriya Poshan Maa, (National Nutrition Week) dak sendakba nung Rongjui/September 19, 2018 nü Eklavya Model Residential school Diphupar nung Tribal Food Mela ayongzüka agiogo, ta tanü ketdangsertem osang ka ajanga metetdaktsü.
Iba sentong nung tetushi tejaoker, Dimapur Deputy Commissioner, Sushil Kumar Patel (IAS)-i, Ato kilonser, Narendra Modi lenisüba kübok India sorkari linük nung Nutrition standard tajungba akumtsü atema National Nutrition Mission mapatong ya benok, ta metetdaktsü.
Iba scheme kübok tanurtem dang masü saka mashisa aliba tetsürtem aser tanur nem mamatzü tagutsüdak tetsütem anema-alibaren atema asalentong yanglur inyaker.
Tanur ana shia nungi kabo ‘anaemic’; tanur asem shia nungi kabo mal-nourished, ta shia Sushil Kumar-i, Rashtriya Poshan Maa ya Ato kilonseri taküm Metsüremi/March ita nung tenzüktsü, aser iba ya linük nung tanurtem nutrition tajungba kümdaktsütsü nükjidong nung tenzük; aser iba scheme kübok linük nung district ajak ayimjemtsü, ta metetdaktsü.
Yimtitem nung chiyungtsü nung ‘adulteration’ kanga bulur, ta shia DC-i, Tribal chiyungtsü tetezü mozü/chemical mamshii tsünütetba chiyungtsü, “Organic chiyungtsü ya temang atema kanga junger,” ta ashi.
Kasa sentong nung Rashtriya Poshan Maa Brand Ambassador, Professor Alongla P.Aier-i, nutrition agi mepirira bilemba ama temang aser shisatsü junga merenloktsü, ta ashi.
Laisa kaketshirtem dang chiyungtsü shidak junga achitsü aser temesepba mozü, yi aser moko nungi pilaa alitsü ayongzük.
“Pei taküm tajungtiba nung alitsü aser nüburtem nem tajung meyipa agutsütsü nükjidong yuang,” ta lai ajungshi.
“Linük kati pei chirtem, lanurtem aser tetsütem anepalu mesüra shisabulutsü langka lir,” ta laisa ashi.
Kasa sentong nung Ministry of Tribal Affairs nungi Deputy Director, Biswas Behari Panigrahi-i, National Nutrition Mission nükjidong ya maongka junga manguba tanur aser tetsütem nutrition mission küboki aitdaktsütsü atema lir; iba mission ajanga tanur aser mamatzü tagütsüdak tetsütem crore 10 ajangzükdaktsütsü, ta metetdaktsü.
Sentong nungsa EMRS Diphupar nung azüngertemi kentenmenü den jilushi ajanga shilem agia liasü.
Nongothung Ovung leniba nung sentong agi aser Administrator EMRS, Rev. Yanger Walling-i tepela anküp o jembia liasü.
Iba sentong ya Tribal Research Institute, Department of Art & Culture aser Department of Planning & Coordination, Government of Nagaland senteper ayongzüka liasü.