Nütsüng tali arenba ya tebilemtsü ka kümogo: PM Modi

New Delhi, August 15 (Agencies): Brihostibarnü Red Fort, New Delhi nung India nunger 73buba Independence Day sentong nung onük jembidang Ato kilonser, Narendra Modi-i linük nung nütsüng tali arenba azüoktsü atema sensotem ayongzükogo.
Modi-i, linük nung nütsüng tali arenba ya mazüoktetra sorkari nüburtem sensak tia nungi anitettsü atema meranga inyakba ya amajok akümtsü, ta ashi.
“Tanü ni nenok den tongtibang onük ka lemsateper, aser ibaji nütsüng tali arenba lir. Asenoki shisadangtsüla. Asen chinurtem atema bilema asenoki inyaktsüla. Nütsüng tali arenba atema o lemteptsü aser awareness agütsütsü nüngdak,” ta ashi.
Paisa, kibong tila ayurtemi (tanur ana) linük terenlok nung shilem tajung agir, aser ibajia linük meimba lir, ta ashi.
Modi-i taküm agi küm 6buba atonga I-Day sentong nung jembiogo. Tanü pai minute 92 agia onük aika jembia liasü.
Modi-i armed service asem atema Chief of Defence Staff post ka tentetba, tzü tajemtsü agütsütsü atema “Jal Jeevan mission” tenzükba, linük nung infrastructure terenlok atema sen crore lakh 100 indoktsü aser India-i kiralongra pusemba linüktem jungkai adoktsütsü atema jembi.
Paisa sorkari Jammu & Kashmir nung Arrla 370 agienba, triple talaq anentsüba, India tasenba yangertsü, linük ka temzüng ka, Vande Bharat Express train, taruba küm pongu tsüngda linük rongsenkettsüng 5 trillion akümtsü, alima linüktemi India den shishilembatsü jangraba, linük nung single-use plastic mamshitsü aser aluyimertemi fertilisers ajema amshitsü atema jembia liasü.