NVCO-i MKR Pillai mapa CBI nem bushisüngdangdaktsüner

Kohima, July 13 (TYO): Nagaland police nung constable nungi Additional Superintendent of Police tashi tua inyaksang, MKR Pillai ajanga Nagaland police maparen aika nung temulung malemtsüsa ochimashi mapa inyakbatem puteta alibatem jungjunga bushisüngdangtsü asoshi CBI nem agütsütsüla ta Nagaland Voluntary Consumers’ Organisation(NVCO)-i state government nem takhangba ka agütsüogo.
MKR Pillai ya Nagaland police department nung Consultant shim aser pai dang Nagaland police tongti maparen repranga liasü ta angazüker. Tawa Income Tax purtemi pa mapa den mesütepi rongsen crore meyirijang dak tali jenjang akaba puteta liasü. Iba denji oagi Kerala nung Nagaland police gari truck ka anena aliba dena putet.
Iba dak sendakba maparen nung Naga nunger lokti tentet aikati CBI nem bushisüngdangdaktsütsüla ta takhangba agüja lir saka yashi Bodbar nüang Nagaland cabinet-i MKR Pillai-ji Nagaland police consultancy mapa nungi anentsüogo. Iba denji külemi ano pa ajanga ochimashi inyakba ken o boluba indang Income Tax purtem dang nungi meshitsüla ta cabinet-isa lemtettsü.
Ano, Cabinet-isa oagi Kerala nung Nagaland police gari ka aliba indangjia osang agiteptsüla ta metetdaktsüogo.
Kasa senden nungsa Nagaland Food & Civil Supply department nung jangotsü aser kerosene mashi amshiba indang bushisüngdangba mapa ya yaktasa atemtsüla ta cabineti metetdaktsü.
MKR Pillai mapa Income Tax ajanga bushidang putetyonga aoba maparen nung pa dang masü saka Naga nunger yimsüsür aser tulurtem aika dena alitsü, anungji iba mapa ya CBI nem dang bushisüngdangdaktsütsüla ta NVCO-isa metetdaktsü.
Parnokisa ashiba agi, taoba mapang ka NVCO office ajanga Police department nung “Modernisation of State Polices Forces” sentongtem asoshi senotsü yokba aser amshiba indang RTI ajanga asüngdanga liasü saka iba telangzüba nung senotsü aruba aser endokba kecha mesayu. Ajisüaka, tang Nagaland yimten nung tatartem yamai asayatepaka, Pillai ajanga inyakba mapa yabo paidoktsü makok,” ta NVCO-isa metetdaktsü.
Tang nungibo state goverment nung talisa tsümartem shinga consultant meshimtsüla ta parnokisa metetdaktsü. State government-i Lokayukta meshinüba ya Pillai-ba otsü amato aika alitsü aser itemji jungkai madokdaktsüner asütsü ta parnokisa metetdaktsü.