NVWA-i Naga amitsürtem nem tetushi agütsü

Kohima, August 15 (TYO): Tanü State Banquet Hall, Kohima nung 70buba linük Independence Day benjungmung nung Naga Voluntary Women Association (NVWA)-i sentong ka ayonga Naga kin ajak nungi amitsür teintet parnok 70 dak tema nem tetushi agütsüogo, ta Chief Minister’s office, Nagaland Media cell-i sangdong ka ajanga metetdaktsü.
Iba sentong nung lokti pelaa agizükdang NVWA Tir, Kevi Rangkau-i, tesüiba mapangtem nung NWVA-i charity mapa balala inyaka aruogo aser takümbo züngsem ajaki Naga tsürtem, talisa Naga amitsürtem atema sentong balaka ayonga agitsü lemteta liasü, ta metetdaktsü.
Iba tenteti amitsürtem nem sempet tilaka agütsüba ya 70buba Independence Day benjungmung nüngtem nung agütsür, ta shia lai parnok dang “Naga lokti atema maneni mapa tajung jenti inyaktsü atema iba tentet asoshi maneni sarasadem nung bilemtetdaktsüner,” ta mepishi.
Kasa sentong nung NWVA tongti tezülur, Kakheli Jakhalu-i NWVA mükjidong aser teinyaktsütem metetdaktsüdang lai, NWVA ya tajangzük mebushiba aser sorkar den sentaktepa maliba tentet ka lir aser iba tentet nung züngsem rongung Council of Ministers, bureaucrats, technocrats, police ketdangser kinüngtsütem aser tetsür doctor-tem lir, ta ashi.
Laisa,  NWVA  indang tongtibangtiba nüjidongji MLA aser ketdangser kinüngtsütem sabang ka nung longjemer nüburtem, Naga tsürtem aser tanurtem atema inyaktsü asoshi lir, ta ashi.
Linük anogotem (Republic day & Independence Day) ajak nung iba tenteti jails, asylums, centers aser charity institution rejutem semdanga senotsü aser osettsüset tenla agüja arur aser sentong balala ayonga arur, ta laisa metetdaktsü.
Tanü iba sentong Kakheli leniba nung agi aser spring voice Sumi Baptist church-i temeja ken ka aten aser Rev Kuzierang Thou State Chaplin, Nagaland-i sarasadema liasü.