NWA wrestling senpet atema raffle draw ka asayatsü

Kohima, October 4 (TYO): Nagaland Wrestling Association (NWA)-i wrestling asayaba atema senpet balala agütsütsü asoshi October 2 nü raffle draw ka akatsüba atema sentong tenzüktsüogo.
Iba sentong ya Wrestling Federation of India (WFI) tatongtir Neikhrolo Khalo-i Kisama nung NWA pur senden nung tenzüktsü.
Iba raffle draw ajanga ajangtetba sen ya taruba NWA tournament 2018 aser Angami Sports Association, Chakhesang Wrestling Association aser Zeliang Wrestling Association, melangtepba asayamung nung senpet agütsütsüba nung amshitsü
NWA tournament 2018 nung sen ajak agi, lakh 7.60 indoktsü, kong takoker nem senpet sen lakh 3 tanabuba jenjang nung takok angur nem sen lakh 2, tasembuba atema sen lakh 1, pezübuba atema sen 80,000 aser quarter final tonga asayateter shia nem sen 20,000 agütsütsü.
Maneni NWA-i, ASA, CWA aser ZWA unit wrestling tournament atema senpet kasa küma yanglutsüogo. Takoker nem sen lakh 1.50, tanabuba jenjang atema lakh 1, taembuba atema 70,000 aser pezübuba jenjang nung tembangernem sen 50,000. QF tonga asayateter shia nem sen 10,000 agütsütsü.
Iba senden nung 26buba NWA tournament 2018 March 8-9 nung akatsü lemtet. 2018 nung free style wrestling mezüngbuba anogo nung asayatsü aser Naga style taruba anogo nung asayatsü.
2018 nungi tenzüka free style asaya nung category pongu dang asütsüba atema iba senden nung telemtetba agi. Teburtem atema 57 kgs, 65 kg, 74 kg, 86 kg and 97 kg aser tetsürtem atema kg, 55 kg, 59 kg, 65 kg and 72 kg ta alitsü.
Maneni free style melangtepba nung takok angurtem national jenjang nung state tenüng nung masayara NWA asayamung nung shilem magidaktsütsü asoshi iba senden nung telemtetba agi.
Iba senden nung ano Naga nung melangteper parnok trok nem tenüngsang agütsüba sentong ka kaa liasü. Par trok-i 5buba Asian Indoor & Martial Arts Games 2017 Ashgabat, Turkmenistan nung akadang shilem tajung agia liasü.
Parnok rongnungi Tuophema yimtsüng nungi Keduovilie Zumu-i kg 90 jenjang Kazakh Kuresh style belt wrestling asaya nung bronze medal angu. Zumu den Naga nunger melangteper Surhoneyi Soho, Visevo Zashumo, Vechita Khesoh, Menuosetuo Yiese aser Venuzo Dawhuo nunger ya Indian belt wrestling contingent nung densema liasü. Parnok ya NWA tir Neivikuolie Khatsu aser general secretary Vekhozo Ringa na lenisüba kübok shilem agi.
Khatsu-i ashiba agi, referee refresher course October 19 nü akatsü aser freshers course October 20 nü akatsü.
Iba senden ya NWAtatong tir Mosonyi Domeh lenisüba kübok aka.