‘NYAY’ scheme senji tetsürtem accounts nung inoktsütsü: Rahul

Telangana, April 01 (Agencies): Tanü Congress party Tir, Rahul Gandhi-i, ‘NYAY’ scheme kübok sensakertem nem agütsütsü aliba senji tetsürtem indang bank accounts nung inoktsütsü, ta metetdaktsü.
Tanü Telangana kübok Nagarkurnool Lok Sabha constituency nung aliba Wanaparty jila nung election nüboyim sentong ka nung jembidang Rahul-i, “Iba sen ya kibong nung tetsür indang bank account nung inoktsütsü. Ita shia iba sen ya tetsürtem indang bank account nung indang-indanga inoktsütsü. Tetsür crore aikati tashi angutsü aser India-i lasasa nokdaktettsü,” ta ashi.
Lok Sabha election atema Congress manifesto nung NYAY scheme densema lir.
Ato kilonser, Narendra Modi-i sensakertem indang bank acoount shia sen lakh 15 inoktsütsü ta nangzüka liasü, ta shia Rahul-i, sensakertem akhümketa litettsü atema Congress-i ‘Nyuntam Aay Yojana’ (NYAY) sangdonger, ta metetdaktsü.
21buba Aso nung nisung ka income ji sen 12000 dang nungi tajemba masütsüla, ta Congress-i bilemer; iba scheme ajanga linük rongsenkettsüng ajungkettsütsü, kechiyong iba sen jagi sensakertemi shishitsü, ta pai ashi.
Paisa, UPA-i Centre nung sorkar aküm nungbo Lok Sabha, Rajya Sabha aser state assemblies nung tetsürtem nem menden shilem 33 lemzüktsütsü, aser Central sorkar mapa nunga tetsür nem menden shilem 33 lemzüktsütsü, ta ashi.
Tanep Zaheerabad nunga election nüboyim sentong ka nung jembidang Gandhi-i, Congress-i dang BJP anema raratettsü, ta shia state nung TRS sorkari Amit Shah-i aniba party den loktepba atema aitsü.
Election agitsü anogotem sangdongba sülen pai mezüng Telangana semdangba mapang nung pai, China-i anogo ka nung mapa 50,000 adokdaktsür, ajisüaka Modi-ibo anogo ka nung mapa 27,000 samadaktsür, ta aija liasü.
“Pai (Modi) küm shia mapa crore 2 nangzük. Nenok karibo mapaji ngur asü?. Tesüiba küm 45 tsüngda Modi-i yimsüsüba küm pongu nung mapa manguba rate timtiba liasü, ta pai aitsü.
Rahul Gandhi-isa, UPA-i sorkar kümra parnoki shisaliok, school aser college, universities aser institutions amenokba den scholarships agütsüba nung GDP shilem 6 indoktsü, ta metetdaktsü.