NZP nung Royal Bengal Tigers ana bener aruogo

Dimapur, January 9 (TYO) : Kerala nung aliba Thiruvananthanpuram Zoo-i Nagaland nem Royal Bengal Tigers ana agütsüba January 9, 2017 nü Nagaland tonga bener aruogo.
Küm ana tashi maparen inyaka aruba sülen Nagaland Zoological Park, Rangapahar nung keyi ana- Karthika (tetsü) aser Manikantan (tebong) züngsemogo.
Keyi anaji Thiruvananthanpuram Zoo nungi staff 10i anir aru aser hopta ana shi quarantine nung ayutsü, ta Nagaland Zoological Park Director, Sentichuba Aier-i sangdong ka nung metetdaktsü.
Keyi ana melenaji Nagaland Zoological Park-ia Black Asiatic Bears ana agütsütsü aser shirem ana tenüngji Kohima (tebong) aser Dimapur (tetsür) lir, ta sangdong nung shia lir.
Maneni ita ishika sülen Zoo nung White Tigers ana bener arutsü aser anogo 15 sülen ang zoo semdangertemi Kerala nungi bener aruba keyi anaji angutsü, ta Sentichuba Aier-isa ashi.