O jembitsüla

Oya mangur anungji teka agi amdangtsü makoker, saka kechisarina ajak ya o agidang tenzüker aser o agidang mapa akümer. O agi yimjung bener arur aser o agi rara menar. O agi peladaktsür aser o agi jashidaktsür. Aji oda, o ya tashi tulu aketba sayatenya ola ka lir. Iba tashiji amshia Tsüngremi alima, tzüyim, anüng aser yangji aliba kechisarina ajak yanglu. Iba tashiji asenok meimchir nema Tsüngremi agüja lir. Ibayongji, tamasa nisungtemi ita petinui atutsü atema o jembia sentong yanglu aser tutet. O jembia gari, tayimtsü aser computer yanglutsü tenzük aser item yangluteta nisungtem anisüngzükdaktsür. Aji oda, tanü asenoki anguba terenlok mapatem ajak ya tamasabo o dang liasü aser item o temji mapa küma inyakba mapatem lir. Item o ajakji alima nung alir tatar yimsüsürtem aser lenirtemi jembir. Itemji lenirtem mulungjang aser parnok shisatsü nungi adoker. Yimten yimsüsübaren nunga chuba kati dang par senmang küma yimsü asüba melena nübortemi mulungba yimten yimsüsürtem shimteta yimsü asütsüla ta o agi jembia jembia democracy asen lima tashi tonga aruogo. Aji oda, yimten aser loktiliba nung lenirtem asoshi balaka o jembitsüba ya kanga tongtibang lir. Ano, balaka tatar senden ( assembly aser parliament) nung amentsü asoshi yoker yimsüsürtembo o jembitsüba nung takotet, tsüngro tasong aser temetetba shisatsü aliba nisung asütsüla. Tatar senden nung tatar (MLA & MP) asütsü yokbaji tangar jembiba angai yoker masü saka pa nem vote agütsür aser magütsür ajak tenüng nung jembitsü asoshi yoker. Anungji, pa mesüra laji nübortem asoshi o jembitsür nisung ka akümer. Ibaji khuret tulu saka jangratemtsüka lir. Ibayongji, nübortem asoshi tatar senden nung ken o benoka jembir telemtetbatem agitsü aser item telemtetbatemji mapa küma inyaktsütsü asoshi tejangrartem election nung tokteper. Atangji, sen meindoki toktepyonga election nung tokteptsüba mapa ya temela masü. Iba mapa nung anibelem tulu lir, nüngsen aika agitsü aser rongsena lalutsü. Ajisüaka, sempet alirtemibo jangrar aser nübortem tenzüktsübaji pei mapa kümadoker. Aji oda, tatar senden matongdang election agiba mapang nungi tenzüka o jembitsü tenzüker. O agidang election nung toktepertemi kechiba tatar kümner aser nübortemi temulung lemteta shimtetra kechi inyaktsütsü ta asüba tebilemba aser nükjidong metetdaktsür. Atangji, asen lima nungbo küm aika election mapang lokti senden ayonga candidate-temi jembiba mangu aser mangashi. Iba jagi nübortemi candidate-sangji komala nisung, pi rongnung o jembitetla asü masüar memetet aser mejangja ser yoker südi. Aji oda, election nungbo sen crore aika endoker, süng long amshia rarateper aser injang bomb amshir. Iba ama rara aser rongrong tulu adoka election agiba ajanga adokba tatarsangi pei constituency ajanga orrbo Kohima nung ola madoktetter. Nübortem asoshi maksü, tezüdangtsü, tamakok aser takoksaji aji asütsü. Election nung akokyonga tatar senden nung tepanger koka mejembitetra aser mapa inyakdak office balala nung ketdangsertem mulung koka jembia terenlok mapa bener marutetra election nung akokba takokji taila takok ama kümadoker. Iba ama taila takok jagi asen lima küm pongongo timtemdaktsüdagi. Aji oda, asenoki tatar senden nung o mejembitettsüla tatar ka shimer yokbaji asenok tenüng nung okadak ken o jembitsü atema okatsür (advocate) o jembi mashi ka yokba amai lir. Atangji, tatar akümtsü atemabo tazüngba degree tuluka menüngdaker, saka temeyong anemtsüsabo masütsüla mesüra tangari jembiba o ano tangar kati meyipa ashitsüla purbo masütsüla. Tatarji tatar, pa mesüra laji o jembitsü agi tata anungji jembitsüla, mapa inyaktsü aser nübo atsüktsü agi tata anungji inyaktsüla. Aji oda, tatar ka tatar senden nung adentsü yokbaji tembang ka nem korang semer kazüdaktsür amabo masütsüla. Tatar senden nung o jembir melira, tatar sendenjia jangramatem, anungji yimtenjia meramaket, saka tatar senden nung o toktepa jembir tatartem aika lira lemsalemsar jangratemtsüka aser yimtenji akümketketer asütsü. Tang yabo tangari kanga junga jembir saka asenok ola maka, iba jagi Nagaland nung asenok mali amato kümogo !