O Kibuba, Ne tebilemba kanga tarok (T.Ken 92:5).

Aji asünung iba o angashiba anogo nungi onoki nenok asoshi maneni sarasadema mepishir. Tanela shisatsü aser tangatetba ajak nung pa mulungba metetba agi nenok sangtettsü asoshi, aser Tsüngrem metetba nung rena, mapa tajung ajak nung tejang tanga, aser ajak nung Kibuba mulung chidakja temsüa jajatsü asoshi onoki sarasademer (Kolosi 1:9,10). Tamang ajanga nenok temulung nung Khrista litettsü asoshi, nenok temeim nung tera yanga akangakanga noktaker, nenoki temeshi pur ajak den lenden aser metong aser tema aser tarok kechi lir, aji angazüktettsü asoshi… ni tebu dang sarasademer (Ef. 3:17-19).
O Tsüngrem shisatsü aser temetetba koda tarok! O bendangba bushitettsü aser lemang tsüngsü aputsü koda tamakoktsü (Rom 11:33). Kechiyong kü tebilembatem nenok tebilembatem masü, mesüra kü sentongtem nenok sentongtem masü, ta Kibubai ashir. Kechiyong alima dang nungi anüng temaba ali ama, yamaji kü sentongtem nenok sentongtem dang nungi talangba, aser Kü tebilembatem nenok tebilembatem masü (Isa. 55:8,9). O Kibuba kü Tsüngrem, nai inyakba tesüngmangtsü mapa, aser nai onok tsütsü bilemba aika lir. Ne den medemdangtsü tangar shinga mali. Ni item indang metetdaktsütsü aser ashitsü asübo, itemji mezüngdangmai onsara alitsü (T.Ken 40:5).
O Kibuba, Ne tebilemba tarok Ne O ajanga bushitettsü Kü dang sayuangma. Amen.