O Lemsatepba sabang Olemsabang ya koda tajung aser tongtipang lir

– R.Imkong Lkr, 4th Mile, Diphupar, Dimapur.

Ni kü tangatetba ka Tir yimyim sabang nung tazünger ajak den olen ka lemsatepner. Iba olemsabang ya nübur-tem tsüngda nung o ashishiteptsü atema zülur masü, saka kati ka ajungshiteptsü aser tangatetba tajung nung metongshiteptsü atema zülutsür.
Tamasa kü o tenzüka maotang (saka maodang ta masü) kechiyong ascent ta English oshi nung ajaba ama, iba ola osü yaa kangasa tongtipang ta shitsür. Tatishitsü agi tang ola-ji tekaleni atur saka Dang-ola-jibo tera tsünglangleni züngzüka alur (sign) ta metettsüla; aser iba ola osü ya ni tamalen-tu-a khen ashishi-a zulutsüogo. Asenok temeshi laishiba nunga iba olasütem ya aisü nung melenshitsüsa ajiteter. Tatishitsü kar yamai agütsür B aser P , parnok ta ajabaji tanganütsüka lir, saka Barnok ta jaa amshira tangatsüji kecha majung angateter. Aser ano T = Tang (sign) ta amshia ajabaji kang tanganütsü ka lir. Saka kari Dang ta amshir (sign) tatishitsü agi pa tang arutsü; iba olasü ya kanga tanganütsü ka lir aser angashir, saka pa dang (sign) arutsü ta amshira aser jara, ibaji tangar kin kati asen Ao oshi kanga saksaka jembiba ama angashir. Anungji iba olasü yabo melenshidi arung ta metongshitsür.
Maneni-Tamasa kü o tenzüka maotang Tir Yimyim Editor-ba nem mezüngpuba nung tenüngsang agütsür, kechiyong pai anir Tir Yimyim sabang nung inyaker kwika ali, Aor yimkongsanger ajak ajungtsü mechi nung tanitebelem arema taküm tenla tajung agüja inyakba angudang tazünger aser tezülurtem ajaki temulung nena (chia) bilemer, aser nenok ajak dang pelaa aliba ka meshisemi meliteter. Aser iba dak alaka, ano nenoki nübur ajak nem pei pei tebilemba lemsateptettsüsa olemsabang (column) tajung ka lapoktsü nung nübur ajaki pelateper.
Yamaji ni amala mashi-memetetba nübu katia sang maongka tajung ngutetbaji oda, taküm nung takok tulu ka ngutet amai bilemer aser züngshir. Anungji nenok kotang koba osepsa tezulur nungi agizüka paper nung zulutsüdir, kanga nemzünga zuludaktsüner ta mepishir. Kechiyong nenoki zulutsü-dang ojang ka paidok nung osep nung züluba tetezü-tem taginübaji raksatsür ta metettsü tim. Tatishitsü agi “Nung” mesüra “Nungi” ta amshiba nungji tangatettsü kaji kotang (sign) pa “nung” aliba shisatsü, tetezü (original) “nung” aliba ta shinerba. Saka kotang “nungi” ta shidir, tangar “nungi” angazükba shisatsü ta shinerba ta angatetdi. Tenaji tependang tulu lir.
Oda ashitsü agi, tanü putu tensa mapang ya repranga aru nung alima ya kanga talangkasa tejakleni renloka aoba angur, iba den külemi asenok aliba alima ya, oda, pungmang lima ama “computer age” küma dokogo. Aser “computer advancement” ajanga tanübo nisung kulok shisatsü dang nungibo tekaraba, tabensaba, tebiriba inyakteta aoba angudang, asenok tesülen atzüngzüka aliba kintemi kanga süngmangteper. Aser “Third World War” tasempuba alima ajunga rara nungjibo nisung melena computer machine agi ang “war front” tongpang jaktep raraba nungji shilem tulu agia rarateptsü renemtepdar ta alima osang ajanga angashir. Koda jangratemtsü ka asütsü ! Aser tesüngmangtsü mapatem asenok taküm alirtemi itemji nguyonga aotsü anendaka lir, anungji asenok ajak tanela atema renemshia atatsübaji kanga tongtipang ta ayongzüker.
Tang, danga olen taginüba dangjagi arudi; tanü asen len-nir tajung ka Wabong Talitemjen Imchen ajanga olemsabang nung pa tebilemba Tir Yimyim Adok 98 VOL XIV dt. 20th January 2017 anogo nung Ao osep ASLB aser kü tebilemba ta ser adoktsüogo, ya khen asenok ajaki arokaroka shisadangdi arungma. Ni amanger pai züluba ya “constructive criticism” yanglushinüba, metongshinüba nung ajemdaker zulu ta nibo angateter. Iba olemsabang nung pai kechi lemsatepa züluogo, iba ya Aoo oshi oben nung “Asüngsashiba “Social Renaissance” ka ta ajiteter. Aser pai ashiba ama, paper nung osep ka zulutsüba, mesüra adoktsütsübaji kanga temelabo masü ta nia o semlok ka shisemer. Aser sabang nung kechi, koba osep otsü-olemsa shirnokisa zuludir pa mesüra la ajangzüktsü mechi nung shingaia mezülui alitsü ta amanger. Saka asenok ajak ajungtsü mechi nung züluteper ta angatetdi. Yamaji asü nungji, asenok ajaki kanga süoki ia itemji bilemdanga shisadanger tajungtiba agiteta bener odi ni ta ayongzüker.
Yangi pai züluba “paragraph” oren-olen pungupuba nungji “Nüpang tu nung tzü shiloktsü ama” ta zülua angur. Iba tetezü, khen agi nisung ka dak kecha o-a mamongba ta shinerba alitsü ta angateter. Anungji iba tetezü ya khen rajemshia angatettsü merangdi, kechiyong asen Aori tela-tezüba aser tetezü tulu aketba olong aika amshiyonga, jembia aru; aser item rongnung ibai-a ka lir. yamaji Nüpang tu ya manü nungi-sa adokba chiyungtsü tajung rongnung ka lir, aser Nüpangji Manü “Taro, English word” nungi adokba tedong (stem) ka lir, aser idakjiang tu adoker, ta asünungji manü tu mesüra manü ou ta aja nunga tajungba tang asütsü; iba jagi Nüpang tu ta ajabaji tai ta mashir. Kechiyong asen Aori tetsü tebou mapang nungi tetezü tulu aketba mesüra “Automatic Words” tatishitsü agi “Akübpok” ta anem” tetezü shi telong tulu ka khen agi kecha anüngzüka meyu-i ajak tepang nung nemer meyoka dokba dang ajar. Ibala mesükba, khen agi oshi, olong takar aser tetezü tulu aketba-tem zünger mezüngma asen tsürabour aser tetsü-tebou mapang nungi amshia jaayonga aru. Saka tanü asüng lanurtemi item oshi-oben temji kangabo mamshiba ajanga samaa odagi.
Ni tamalena Tir Yimyim nung khenbo agütsüogo, oda tanü asen lanurtemi medemer o medemer na tsüngda nung, aser teti-tenu aser teyi (sister) tsüngda nung asen kidang kilong nung Nagamese (Naga mix) agi jembitepa angudang aser angashidang kanga menünüasa repranger (nisungbaji angudang) aser ano kanga sasaseta bilemtsür, koda tesüngmangtsü ! Aser iba ama asen kilong nung Brother, sister aser ami khan, tomi khan ta jetepba ajanga timtem aika asen loktiliba nunga bener arutsüba indang zülutsüogo.
Tanabuba nung oren-olem “paragraph” pezübuba nungji ashi ama, ASLB-i yamai amshiang ta tuyur, saka olasü yimya nungbo olong nungji ojangji ibaiang tapetba ta ashidangji ajak ratateper ta zülua angur, kechiba ratateper ? ta süra, junga mangatetba agi ratateper ta telangzübaji agütsür.
Tasembuba nung oren-olen “paragraph” terokbuba nungji yamai zülua angur; Nenoki osep standard o nüburtemi Ao oshi angazüknüba tashi naji medemdanga yangluogo ma ?
England aser America Dictionary melenshia arubaji asadangogo ma ? Osepji kenyongi tuluka tajungtiba melenshir, shingaia manidaktet dang nungibo meraji lenchi arutepa meilongi meratsüla. Asen Aor tangatetba o literature temchi (scope) ji apu (ladder) “communication” raksara ajak telaor, tetezü laoadoktsü ta shirnerba alitsü. Anungji tang temalen shia aliba jagi kechi shiner asenok ajaki angateter alitsü ta amanger. Anungji nia o semlok ka pai zulutsüba nungji ajemdaker ya shier, oda ASLB-i asen Aor atema kechi tajungtiba, itemji reprangdanga, asadanga “Foreign-language” standard amaji asen Ao-oshi ya a iba standard nungji bener onerba alitsü ta angatet-ter saka tanü asen lennir kati zulu medem, tanidakertemji tetezü ASLB-i tetuyuba nung anidak-tet-ter-temji noklang shilem nung 10 (ten) percent tazünger-temji lir. saka manidakteter-temji onok ama tamburtem school azüngtsü joko menua doker aser tangar tanüngba rogotemjia timba (majority) kati, (temi) junga manidaktetter ta süra, tetezü 90 percent-i manidakatetter ta kümra, asen Aor atema kangabo tajangzük malitsü ama bilemtsür, oda ni angatetba yari shisemer. Saka iba tangatetbaji nunga ta bilema lira ajia kecha masü, kechiyong pei pei tangatetba yari lemsatepa shidanger ta angatetdaktsüner.
Kanga pelar.