O semlok

– T. Toshi Longkumer, Aitlenden Tuli.

Aor takotet kenshioshir, kaket zülur Wb.Tsüknung Penzü-i TAILA AO CALENDAR YA TANGSA AGIENTSÜLA ta züluba pa den Semloka tatsüka zülur. Mezüngbuba Aor tarutsü nükdangtem shisatsü angazüka arangshidak Lungzük Wb.Tsüknung Penzü Tsüngremi arishi talang moajang aser pa ama tashi tawar tetemjen nübu aika adokdakjang ta sarasademer. Tang ASLB-i adoka akaba Calendar atema koba taisa lir, ibai anema 2016 küm nungi Aor temetetertemi zülutepyonga arur. Saka teinyakertem nungi kecha olep magütsüi tenük amur ojen aor. Tenüngbo ASLB ta amshir saka nisung ka ana sentong ta parnok telok rongnungia ashir. Aser aji Aor intii meteta lir. Iba ya putusa putu alima matem tashi amshitsüba oset ka tai yanglua yur amshitsü khenyongi temzüng agi memelar. Aser ya teinyakeri tera züa aibelena inyaksemba mapa ka masü. Saka metetsümonga lokti tayimtenba ola mangai temetet shisanga makongdisüa ambangima inyakba lir. Calendar kaji kümshia adoktsü aser iba aben Aor temeteter memeteter ajak araatua asateptsü masü. RCC ki tulu asüyonga nükmen meshidaki tenzüka lira tepsar tanaben tenzükshir. Aser yamala taila Calendar yanglushitsü mapa tasak masü. Taoba mapang Ao oshi Spelling lirumedema amshitsü atsütepdanga AKKOR teloki kaketsa kaket menünger akaba ajak tamakitsü aküm. Ano ASLB-i adokba SHISAJEN kaketa dang ama ya nübur aikati tai ta khuli aika agütsüba agi adoka aliba endoker tasen melenshia yanglu. Ano asen leniri ashiba ama nübur tayimtenba ola mangara Court nung Case agütsütsü aser aji agütsüra tamalen AKKOR purtemi Case agütsüba amato aji matem tashi mapa ajak shibanga ayutsüsa akümtsü. AKKOR purtemi tai temeden bushia moi Court Case Withdraw asüba agidang tanü tashi tangatettep nung tiptema aor. Anungji tekong kanga memerangi ASLB-i tang adoka aliba Calendar ya Aor ajaki agizüktettsüsa yanglushitsüla ta iba O Semlok tezülur pusema nenshir.