O Semlok

~ L. Ngangshi Jamir, Mokokchung  village.

Tejen yimsü yimpong dangi meyiptsü ABAM-i nokdanger ta omen agutsür Tir Yimyim Sept 30, 2015 adok nung ABAM-i adoktsüba dak sentakba nung asen Aor Senso tajung aikati pei tangatetba lemsatepa aruogo. Nia ni angatetba kar tatsü agi lemsatepner.
Limapur mapang nung züngyazüngkutepba ya nisung 2, kidong 2, telok 2, yimtsüng 2 tsüngda nung – Ayong, kimonglumong, yokyasonu ano ibala mesükba agi raktepa niang, onokang shitak – na, nenokang taia ta kibur raktepa ken o adokdang, Ano tebur kari tetsür nem tanur benlokja yur kü chir masüa ta noktakdang, mesüra tetsürlai pei kidong chir bena yur iba maksuji nempangnüdang la den memedemba tebur ka shibai la nükshia liasü, iba tebur dakji tongloktsüdang o bendangeri tebendang agutsüba nung temulung mesüi magizükteti temaba court dangi aoba ama Soba – Tiaba, alima yanglusang Lijaba aser Ita Anü dang asüngdangdi ta akümdang (Yimtenia aji nokdangtsü makok) Yimteni ita anogo mapang atakteta yutsür züngyazüngkutepa aru. Ya Laishibai memelaba inyakyim lir. Tamalen zülurtemi Lai reference aikadang agüja arur asünung khuli atema dang ni Lai tekong ka Mathi 5:33-37 dang agütsür.
Tanü Arogo putu nunga Yimtsüng kar nungbo ataloka aruogo. Yimtsüng telung nung dang atalokba agi ABAM-i mangashi, memetetba agi menokdang südi ta bilemer. Shitakbabo pei Arogoi nokdangtsüba, mekokra ABAM dang ashitsüba tim liasü ta angateter.
Taküma Yim kar nung ataloktsüsa mapangi bentsür aruba osang agi ABAM atong nung ajungbena Sanen Luden jatepa ABAM temzüng aser Laishiba tesayuba dak ajemdaker tenokdangbaji agütsüogo aser ABAM-i teinyaktsü tim inyakogo ta angateter.
MLA, Minister, Police, Sepoy kusem achiba, Tsüngrem tenzükertem wadang balala atema commission asuba, Tsüngrem aser Arogo tsüngdang kiyimertem khulizüng agiba ano iba mesukbatem – item ya züngyazüngkuba masü, yabo pei tenzükba wadang nung ochishia, meranga tenzüktsü, inyaktsü ta sorkar aser nübur tsüngdang, Tsüngrem aser Arogo tsüngdang kijabai (Pai/Lai) tenangzükba agiba lir. Anungji züngyazüngkuba aser tenangzükba agiba na ya balala ta Lai tsütsü nungi aser kü tangatetba lemsateper.